MOABOT sa 133 ka pamilya sa Davao Region gikan sa 235 ka mga benepisyaryong pamilya nakadawat og ayuda sa Balik Probinsya, Bagong Pag-asa (BP2) program, Huwebes sa buntag, Septyembre 28, sa Malagos Garden Resort, Davao City.
Ang 133 ka pamilya ubos sa Davao Region gi-endosar sa Department of Social Welfare and Development (DSWD) ngadto sa ilang kaanib nga National Government Agencies (NGAs) sama sa Department of Agriculture (DA), Department of Interior and Local Government (DILG), Technical Education and Skills Development Authority (Tesda), Department of Trade and Industry (DTI), Department of Labor and Employment (DOLE), ug uban pang mga ahensiya.
Uban sa tema, “Pamilyang BP2: Pag-asa sa Maunlad na Komunidad”, tumong sa kalihukan mao ang pagpromotar sa pakig-alayon tali sa mga hingtungdan sa programa ug sa multi-sectoral nga mga kalihukan.
Ang ayuda nga gitunol ngadto sa mga benepisyaryo naglakip sa Transitory Family Support Package (TSFP), kon diin matag pamilya makadawat og "one-time cash" nga P50,000 alang sa pagkaon ug non-food items nga molungtad sulod sa tulo ka bulan; Livelihood Settlement Grants (LSG), kon diin matag pamilya makadawat og P50,000 isip inisyal nilang pundo o pagpadayon sa ilang inisyatibong negusyo; ug Transitory Shelter Assistance (TSA), kon diin matag pamilya makabaton og permanenteng pinuy-anan sa probinsiya.
Sa tibuok502 BP2 pamilya, 225, o dul-an 44 porsiyento nakakuha og package sukad 2021. Kung mapamatud-an nga takus ug gi-endosar sa local government unit (LGU), ang maong mga pamilya makakuha bisan asa nga P140,000 hangtud P220,000 nga packages.
Samtang ang kalainan ngadto sa miaging BP2, ang 2023 BP2 dunay Community Grant Support Sub-Projects tungod sa pagdawat sa mga munisipalidad og 20 ka benepisyaryong nibalik sa Balik-Probinsya.
Ang BP2 program maoy usa sa mga pamaagi sa suporta aron nga maluag ang mga komunidad sa urban poor kon diin ang insidente sa COVID-19 taas kaayo. Nahimo kini pinaagi sa Executive Order 114, nga gilagdaan ni kanhi Presidente Rodrigo Duterte niadtong Mayo 6, 2020. (PR)
