Construction worker, driver sikop sa buy-bust

Construction worker, driver sikop sa buy-bust

Construction worker ug usa ka driver nadakpan sa buy-bust sa Philippine Drug Enforcement Agency (PDEA 7) uban sa pag-abag sa Mamba­ling Police Station ug Naval Forces Central (Navforcen) alas 2:10 sa Sabado sa kaadlawon, Septiyembre 30, 2023.

Ang mga suspek giila nga sila si Alfie Abella, 34, driver, taga Barangay Sapangdaku, dakbayan sa Sugbo ug Frangie Bernaldez 26, construction worker, taga Barangay Pasil.

Nakuha gikan kanila ang usa ka dako’ng putos sa gituohang shabu nga motimbang og 25 gramos nga dunay street drug price (SDP) nga P170,000, lakip na ang buy-bust money ug usa ka cellular phone nga naa karon sa forensic team sa PDEA 7.

Gikan sa usa ka kasaligang tinubdan ang impormasyon nga nadawat sa PDEA 7 nga maoy hinungdan nga ilang gipaubos sa case build up.

Samtang nasikop usab sa mga sakop sa Provincial Intelligence Unit ug sa Provincial Drug Enforcement Unit ang giila nga high value individual sa Candulawan Road, Barangay Bulacao, dakbayan sa Talisay alas 10:05 sa Biyernes sa gabii, Septiyembre 29, 2023.

Ang suspek giila nga si An­dey Badayos Jorge.

Nakuha gikan sa suspek ang mga pinutos sa gituohang shabu nga motimbang og 16 gramos nga dunay SDP nga P108,000.

Sa lungsod sa Liloan, ulitawo nga namaligya og ilegal nga drugas nadakpan sa buy-bust sa alas 5:20 sa Biyernes sa hapon, Septiyembre 29, 2023 sa Purok Dabong Barangay Yati.

Ang suspek giila nga si Dwight Palomo Gacayan, 26, taga Poblacion Barangay Yati, lungsod sa Liloan.

Nakuha sa kapulisan sa Liloan sa pagpangulo ni Police Major Eric Gingoyon ang mga pinakete sa gi­tuohang shabu nga motimbang og 5.24 gramos nga dunay SDP nga P35,632. 

Trending

No stories found.

Just in

No stories found.

Branded Content

No stories found.
logo
SunStar Publishing Inc.
www.sunstar.com.ph