Ning nagkaduol nga Barangay ang Sanguniang Kabataan Elections (BSKE), ang Communist Party of the Philippines (CPP) uban sa ilang armadong grupo nga New People’s Army (NPA) sa Kabisay-an nag-anam na og kahuyang human na-neutralize sa subsob nga mga operasyon sa militar.
Kini ang pamahayag ni Army Lieutenant General Benedict Arevalo, kumander sa Visayas Command (Viscom), sa Dominggo, Oktubre 1, 2023.
“The people are now aware of the evils brought by the CPP-NPA and they have become more active in supporting our internal security operations resulting in the series of setbacks suffered by the terrorist group throughout the Visayas region,” matod ni Arevalo .
Dugang niya nga sa tibuok buwan sa Septiyembre 2023, dunay 12 ka government-initiated armed encounters ang nahitabo sa tibuok Visayas.
Subay niini, naka-neutralized ang AFP og 54 ka sakop sa CPP-NPA, 19 niini ang nalakas sa engkwentro, 32 ang mibalik sa sabakan sa balaod samtang tulo ang nadakpan. Nakasakmit usab ang gobiyerno og 38 ka mga nagkalainlaing kalibre sa armas ug siyam ka anti-personnel mines sulod sa usa ka buwan.
Matod ni Arevalo, ang katawhan nasayod labot sa kadautan nga gidala sa CPP-NPA sa ilang komunidad nga tungod niini mipalig-on pa ang ilang pagtabang sa gobyerno aron maangkon ang malungtaron nga kalinaw ug kalamboan sa ilang lugar.
Ang kampanya sa Viscom sa miaging buwan nisentro sa pagtahan sa daghang mga sakop sa NPA, ang engkwentro sa lungsod sa Bilar sa lalawigan sa Bohol ug dakbayan sa Kabankalan sa Negros Occidental pinaagi sa paninguha sa 47th Infantry Battalion ubos sa 302nd Infantry Brigade.
Nakatala sila’g 12 ka mga miyembro sa NPA nga na neutralized nga dunay 12 ka armas ang nasakmit. Ang laing kalampusan nahitabo sa Leon Kilat sa probinsya sa Iloilo pinaagi sa 61st Infantry Battalion ubos sa 301st Infantry Brigade diin tulo ka mga NPA ang na-neutralized ug duha ka armas ang nasakmit.
Samtang, ang mass surrender nahitabo sa dakbayan sa Sagay, Negros Occ. pinaagi sa paningkamot sa 79th Infantry Battalion sa 303rd Ifantry Brigade diin 12 ka NPA nga giila nga kanhi sakop sa nabungkag nga Northern Negros Front ug dala nila ang ilang 12 ka armas sa pagtahan.