Patay ang usa ka drayber sa electric trike (e-bike) human pusila sa mamumuno nga nagsakay og motorsiklo, alas 9:15 sa gabii sa Sabado, Septiyembre 30, 2023 sa Sitio Macabaja, Barangay Duljo Fatima, dakbayan sa Sugbo.
Ang biktima giila nga si Alvin Cabrera, 27, nagpuyo sa dapit.
Sigun sa pamahayag sa mga nakasaksi nga nagtindog ang biktima sa daplin sa karsada ug kalit nga niabot ang riding in tandem nga naka-full-face helmet ug nag-long sleeves, dayong pamusil.
Matod ni Police Major Jonathan Beethoven Taneo, hepe sa Mambaling Police Station, nga human nadawat ang alarma, daling niresponde ang iyang mga sakop sa dapit.
Ilang naabtan nga nagbuy-od na sa dalan apan wala nay kinabuhi.
Nanawag sila og mga personnel sa Cebu City Disaster Risk Reduction and Management Office aron pagseguro kon duna pa bay pinitik sa kasingkasing apan gideklarar nila nga patay na.
Dugang ni Taneo nga base sa paghiling sa mga sakop sa Scene of the Crime Operations (Soco), dunay samad pinusilan sa walang dughan ang biktima.
Sa pagkakaron duna na silay suspek apan nagdumili pa siya sa pag tug-an kon kinsa tungod kay padayon pa ang ilang imbestigasyon.
Drugas ang usa sa ilang gitan-aw nga motibo sanglit dunay nakahatag og impor- masyon nga nabilanggo na kaniadto ang biktima sa kaso sa ilegal nga drugas.
“Amo nang subayon kung naa bay kalabutan sa illegal drugs kay ang among nakuha nga info ang suspect dili man drug personality,” matod ni Taneo.
Ila nang gipangsusi ang mga kuha sa CCTV sa dapit.