GIHAYA na karon sa Cosmopolitan sa Cabaguio, Davao City ang 57-anyos nga babaye nga gipatay sud sa iyang balay kinsa nakatakda nga ihatud sa sementeryo ugmang adlawa, Martes, Oktubre 3, 2023, sa Davao Memorial Park.
Hustisya karon ang gisinggit sa pamilya sa biktimang si Lilian del Campo Nieva, sanglit blangko pa ang kapulisan sa Baliok Police Station, ubos sa Davao City Police Office, sa pagtumbok sa posibleng mga responsable sas krimen.
Nasayran nga unang napalgang wala nay kinabuhi ang biktima niadtong Septyembre 29, 2023, magtulo ka adlaw na nga wala mitubag sa mga tawag ang biktima hinungdan nga gisubay na sa iyang mga kabanay sa gipuy-an niini sa Bago Gallera, Davao City.
Ang biktima nag-inusara lamang nga nagpuyo sa iyang balay.
Dako na lang ang kakurat sa mga kabanay dihang sa ilang pag-abli sa main door misugat sa ilang panan-aw ang nagpasad nga dugo.
Sa ilang pag-abli sa kuwarto niini, anaa na sa pagkadugta ang patay nga lawas sa biktima kinsa dunay mga samad punusposan sa gahi nga butang sa parte sa ulo niini.
Nasuta sab nga gipangkawat sa wa pa mailhing mga responsable ang iPhone 12 ug mga alahas sa biktima.
Sa hitabo, usa ka lawom nga imbestigasyon karon ang gihimo sa Davao City Police labot sa naasoy nga ulahing robbery with homicide nga nahitabo sa Davao City.
