NGILNGIG ang kamatayon sa drayber og motorsiklo human nabangga sa traysikel alas 5 sa hapon, Dominggo, Oktubre 1, sa Midsayap sa probinsiya sa Cotabato.
Kini human nga naputlan og ulo ang biktima nga si Paul John Siloy Daquiado, 31, minyo, ug nagpuyo sa Barangay Demapaco, Libungan sa nahisgutang probinsiya.
Gibutyag ni Midsayap Chief of Police, Lieutenant Colonel John Miridel Calinga, nga gimaneho sa biktima ang iyang motorsiklo pauli sa iyang balay. Apan pag-abot niya sa Barangay Villarica, Midsayap, nisulay kini og overtake sa sakyanan nga nag-una kaniya apan nabangga sa kasugat nga traysikel.
Tungod sa kakusog sa impak sa disgrasya, giingong naputol ang ulo niini ug napisat samtang ang lawas mikaliring sa national highway.
Gikanayon sa mga nakakita sa hitabo nga kusog kaayo ang dagan sa Honda Beat nga motorsiklo nga gimaneho ni Daquiado ug nag-ikis-ikis sa kalsada.
Gihatud sab sa ospital ang drayber sa traysikel nga si Bernard Tabudio Acosta, 20, ulitawo nga taga Barangay Lower Glad, Midsayap human maangol.
Gisusi pa sa kapulisan sa Midsayap Municipal Police Station ang impormasyon nga sa wala pa ang hitabo, giingon nga nakig-inom pa ang biktima sa iyang mga kaila human sa tabo sa manok sa lungsod sa Midsayap.
