NAKAGAWAS na sa prisohan ang social media personality nga si Ligaya sa Team Hamloy, Lunes, Oktubre 2, 2023, human siya gipasaylo ni Tagum City Councilor ug content creator Leo Revita tungod sa giingong pagpangawat sa dul-an sa P200,000.
Sa video sa Team Hamloy nga page, makita nga sa dihang nakagawas na si Ligaya, gigakos dayon niya ang iyang partner sa vlog nga si Konsehal Revita ug nahimong emosyonal ang duha.
Unang nang gikabutyag ni sa nasampit nga konsehal nga nagpabilin pa gihapon ang iyang kaluoy ngadto sa iyang katabang nga si Ligaya apan kinahanglan kining mapriso aron nga makaamgo sa sayop nga nahimo niini ngadto sa nasampit nga konsehal.
Septyembre 27, 2023, Miyerkules, gipasikop ni Revita sa Tagum City Police Station ang katabang nga si Ligaya human nga napamatud-an nga siya ang responsable sa pagkawat sa sulod sa Gcash sa konsehal nga miabot og hapit P200,000.
Miyerkules sa gabii, ang konsehal nag-live sa ilang official Facebook page nga Team Hamloy diin nagpaklaro nga gipapriso gayod si Ligaya subay sa daghang mga nangutana sa hitabo.
Giklaro sa konsehal ang pagkapriso ni Ligaya dili kabahin sa ilang content sa vlog.
Sumala ni Revita nga nahurot na ang iyang pasensiya kang Ligaya tungod sa kapila ka beses na niyang pagpanghilabot og kuwarta, diin ang labing uwahi mao ang paghurot niini sa Gcash sa konsehal.
Apan sa paggawas ni Ligaya, gihatagan pa hinuon niya kini og salapi nga mikantidad sa kapin kun kulang P10,000 aron nga magamit niini sa iyang mga panginahanglan.
Mensahe sa konsehal nga daghan unta ang makakutlo og pagtulun-an sa nadangatan ni Ligaya.
Giingon sab sa nasampit nga konsehal, nga ang paghatag og ikaduhang higayon o "second chance" duna kini dala nga daghang pagtulun-an.
Si Ligaya giingong nakatakda nga mobalik sa ilang pag-vlog sa paghimo pa sa ilang daghang content ug posibleng makatambag kini diha sa mga mahinungdanong mga butang nga ilang nasinatian samtang naa siya sulod sa selda sa Tagum Police Station.
