2 menor nalumos sa dagat, patay

DUHA ka kinabuhi ang nakutlo sa miaging semana human sila nangalumos sa dagat.

Unang insidente natigayong Septyembre 27, 2023 sa Sabang Cliff, Kaputian, Island Garden City of Samal, Davao del Norte.

Sa impormasyon gikan sa Igacos Police Station ug sa Kaputian PNP Sub- station, usa ka 12-anyos nga giilang si Feljann Nudalo, nagpuyo sa Sitio Quidopong, Barangay Poblacion, Kaputian, IGACOS, ang biktima.

Nasayran nga kauban sa biktima ang iyang duha ka mga menor de edad nga igsuon nga nangaligo sa dagat, apan disgrasya nga ang biktima wala na nakatunga sa mabaw.

Gidali sa pagtabang ang biktima, ug gisulayan og dala sa ospital apan wala na kini kinabuhi.

Samtang sa Davao City niadtong Dominggo, Oktubre 1, patay sab ang usa ka 15-anyos nga lalaki sa pagkaligo niini sa usa ka resort sa Barangay Dumoy.

Diriyot sab nga malumos ang kauban niini nga 12-anyos nga babaye kinsa na-rescue ug gidala sa Southern Philippines Medical Center (SPMC), kinsa anaa na karon sa luwas nga kahimtang.

Sa mga nagkatag nga video sa Facebook makita nga gitabangan pa og luwas ang biktimang menor de edad sa paghatag kaniya og Cardiopulmonary resuscitation (CPR) apan dead on arrival kini sa ospital.

Nagbangutan karon ang pamilya sa mga biktima.