Mokabat sa 39 ka mga manok igtatari ang nangamatay, lima ang nangaangol duha ka mga pagpangatake sa gihulagway nga upat ka mga iro sa usa ka dakong farm sa mga manok nga pang derby.
Ang unang pag-atake nahitabo alas 12 sa tungang gabii sa Oktubre 1 ug nausban sa ikaduha sa alas 12 sa tungang gabii sa Lunes, Oktubre 2, 2023 sa Sityo Guiso, Brgy. Lumbang, lungsod sa Dalaguete, Sugbo.
Kini ang nasayran sa Superbalita Cebu gikan kang Eugene Villahermosa, pag-umangkon sa tag-iya sa farm, sa pakighinabi niini sa Lunes pinaagi sa telepuno.
Matod niya nga gipahibalo na lang sila sa handler sa mga manok igtatari sa maong hitabo.
Matod niya nga ang tag-iya sa maong mga manok igtatari mao ang iyang uyoan nga si Dalaguete ABC President, Ricardo Villahermosa.
Una pa kining hitabo sa ilang dapit nga may “gibalbal” nga mga manok.
Sa ilang pagsusi, ilang nakit-an ang makalulouy nga kahimtang sa mga hiniktang manok sa iyang uyoan.
Matod niya nga ilang nasuta nga may mga samad pinaakan ang maong mga manok ug ang kasagaran nga gipangkaon mao ang ilang mga atay.
Sa interbyo sa Superbalita Cebu kang Kapitan Villahermosa, nasayran ning mantalaan nga mahalon kaayo ang breeding sa iyang mga manok igtatari kay pipila niini gilangkuban sa Golden Boy Sweater, Gilmore Hatch nga pang derby unta sunod tuig.
Matod ni Kapitan Villahermosa nga dako siya og danyos sa maong hitabo kay naa kini sa di mominos P400,000.
Apan wa na siya motubag pa sa pangutana kon unsang matanga sa mga iro ang ning-atake sa iyang mga mahalong manok.
Ang 39 ka mga patay nga manok gipanglubong samtang ang lima ka mga buhi gitambalan apan di na ma derby kay mga bakol na.
