LUWAS na ang waiter kinsa giluba sa kanhi trato sa iyang hinigugma sa Purok 8A Curvada, Barangay Magdum, Tagum City sa alas 10:30 sa buntag, Lunes, Oktubre 2, 2023.
Ang biktima giila nga mao si Giovanni Abenoja Obida, 34, separado, waiter ug molupyo sa Purok Durian Maximina, Barangay East, Tagum City.
Samtang ang gitumbok nga suspek nailhan nga si Jetty Salcedo Castora, 31, taga Curvada, Barangay Magdum.
Base sa imbestigasyon, nasayran nga samtang ang biktima kauban sa iyang hinigugma nga si Evneza Dumait Ayala, nagtagay og ilimnong makahubog, kalit nga miabot ang suspek nga kanhi boyfriend ni Ayala ug sa wa’y daghang istorya giluba ang biktima gamit ang mahait nga hinagiban nga gibitbit niini.
Ang biktima nakahiagom og samad dinunggaban sa walang bahin sa bukton ug gidali pagdala sa Davao Regional Medical Center aron siya matambalan.
Samtang ang suspek human sa gihimong krimen nagdaling mikagiw palayo sa wala masayring direksiyon. Selos ang gitumbok nga motibo sa maong krimen.
