TUNGOD sa taas nga presyo sa bugas ug liquified petroleum gas (LPGs), pipila ka mga kan-anan o karenderya sa Davao City nagpatuman na og us-os sa ilang takus sa pagkaon.
Base monitoring sa SunStar Davao, mga tag-iya og karenderya ug kan-anan sulod sa dakbayan nagsulti nga ang takal sa ilang kan-on kantidad og P15 matag baso karon niubos na itandi sa naandan. Ila kining gihimo aron nga makaapas sa kataas sa galastohan sa bugas ug LPG.
Kini bisan pa man sa gitakdang presyo nga gipatuman ni Presidente Ferdinand “Bongbong” Marcos Jr. nga naglimit sa presyo sa bugas sa P45 matag kilogramo alang sa well-milled rice ug P41 matag kilogramo alang sa regular-milled rice.
Bahin sa LPG, sumala sa Petron nga mopatuman sila og pagsaka nga P3.75 matag kilogramo. Ubang mga kompaniya sa lana gilauman sab nga mosunod.
Si RJ Lagoa, tag-iya og kan-anan sa Sasa, Davao City, nagsulti nga way kausaban sa presyo sa ilang mga sud-an. Apan kinahanglan silang mopahaum sa "servings" sa ilang kan-anan aron nga makalahutay sa operasyon tungod sa kadako nga galastohan matag adlaw.
Si Berna Amito, laing tag-iya og kan-anan duol sa Agdao, naghisgut sab sa paghinabi nga ilang gi-adjust ang mga presyo sa ilang mga sud-an karong bulana og P5 hangtud P10 matag takus, ilabi na nga gilauman ang pagtaas sa presyo sa LPG.
Matud niya nga ang ilang takus sab sa kan-on karon nagkantidad og P15 gikan sa P10. Kung kustomer mohangyo og P10/baso, iyang ipamugos nga makaserbi siya og P10 kantidad sa takus apan naa ra kini sa mga tulo hangtud upat ka kutsarang kan-on.
Kini nga katikaran nakapabalaka sa mga tinun-an ug trabahante. Kadtong nangaon sa mga kan-anan kinahanglan nga magpahaum sab sa ilang badyet.
Si John Marc Casibog, tinun-an kinsa mokaon sa karenderya sa paniudto, nagbutyag nga sa karon iya nang gikonsidera mokaon og paniudto sa balay inay sa gawas.
Samtang, si “Patty”, usa ka empleyado sa gobyerno kinsa nihangyo nga tagoan ang iyang pangalan, nagsulti isip job order nga kawani, ang pagkaon sa karenderya nakasalbar kanila sa oras ug kuwarta sa pag-order pinaagi sa mobile applications o fast food chains.
Hinuon, ingon nga tungod sa pagtaas sa mga presyo, wa siyay mahimo apan magkonsidera sa iyang galastohan.(ICE)
