NAHULOG, nabun-og, ug nakahiagom og diyutay nga samad, wala gikulata sa pulis, kini ang pagpatin-aw sa Davao City Police Office (DCPO) sa post nga nag-trending sa social media.
Kini nga post sa Facebook bahin sa usa ka dumptruck driver nga gidakop sa pulis tungod matud pa sa kusog nga sirbato.
Sumala ni DCPO spokesperson Police Captain Hazel Tuazon, nga ang dumptruck driver gipara sa pulis tungod kay hapit kini makabangga og ubang mga motorista sa Purok Fatima, Brgy. Mintal, Tugbok District, Davao City mga alas 7:55 Sabado sa gabii, Septyembre 30, 2023, ug dili tungod sa kusog nga sirbato, base sa post.
Giila ni Captain Tuazon ang driver nga si Juvy Batoctoy Serad, 30-anyos nga taga Claver, Surigao, del Norte.
Dugang sa opisyal nga sa dihang gisita si Serad sa mobile crew sa Mobile Patrol 06, wa kini nagpatuo, gipadagan niini og kusog ang dumptruck paingon sa Barangay Mintal ug nagpagukod pa sa pulis.
Sa dihang naapsan, gipangayo ang lisensiya, imbis nga ihatag, nasuko ug giinsulto pa niini ang pulis.
Base sa report, sa dihang nanaug sa trak ang drayber, aksidente kining nahulog ug sa dihang giduol sa pulis, natimahoan nga kini’g ilimnong makahubog.
Giseguro sa kapulisan nga di na kining tugutan nga makamaneho niadtong taknaa kay basin og makadisgrasya pa, labi na nga nakainom kini.
Tungod sa hitabo, gi-isyuhan og citation ticket si Serad ug napasakaan na og kasong Disobedience of a Person in Authority sa korte.
