Amnesty program sa sakyanan kutob na lang sa Oktubre 31

File Photo
File Photo

Ang mga tag-iya sa wala ma-claim nga impounded nga mga sakyanan sa dakbayan sa Mandaue mahimong aduna pay usa ka buwan sa pag-claim sa ilang mga unit, nga mobayad sa ubos nga storage fee tungod kay ang regular nga bayrunon ipatuman human mapupos ang amnesty program sa Siyudad karong Oktubre 31.

Si City Councilor ug chairman sa committee on transportation, Jimmy Lumapas, nag-awhag sa mga tag-iya og sakyanan sa Lunes, Oktubre 2, 2023, nga pahimuslan ang higayon nga nagpasiugda nga way extension sa amnestiya.

Ubos sa ordinansa, ang mga drayber kansang mga sakyanan na-impound mahimong maka-claim sa ilang unit ug makabayad lang og P1,000 nga storage fee bisan pa sa mga tuig nga wala ma-claim ang mga sakyanan, dugang pa sa kantidad sa ubang mga kalapasan nga miresulta sa pag-impound ug pag-tow sa ilang mga sakyanan.

Ang amnestiya naglangkob lamang sa mga sakyanan nga na-impound gikan sa Enero 2020 hangtod sa Disyembre 2022.

Gipasabot ni Lumapas nga ang P100 kada adlaw nga bayronon sa pagtipig sa mga motorsiklo- ug P500 sa upat ka ligid nga mga sakyanan magamit sa higayon nga mahuman na ang amnestiya. Nagpasabot nga ang mga tag-iya sa mga motorsiklo nga nasakmit tulo ka tuig na ang milabay mobayad og kapin o kulang P100,000 nga storage fee ug ang mga drayber sa awto mokabat sa P500,000 ug uban pang multa.

Kaniadtong Oktubre 2, ang Traffic Enforcement Agency of Mandaue (TEAM) nagpagawas lang og 7 porsiyento o 55 sa kinatibuk-ang 700 ka mga sakyanan nga na-impound sukad nagsugod ang ordinansa niadtong Agusto 1.

Nagpasabot nga 645 ka mga sakyanan ang nagpabiling wala ma-claim sa impounding section sa TEAM sa Barangay Centro.

Matod pa ni Lumapas nga pipila ka mga drayber ang nawad-an og interes sa pag-claim sa ilang mga unit tungod kay ang ilang mga sakyanan gikinahanglan nga ayohon o ang uban nga gipalit sa installment wala pa mabayri, gawas pa sa kakuwang sa kuwarta nga ibayad sa mga bayrunon ug mga silot.

Gitugotan usab ang mga tigbaligya og motorsiklo sa pag-claim sa mga unit alang sa ilang mga pumapalit, pagpresentar sa samang rekisitos sa mga regular claimant, sama sa certificate of ownership, ug pagbayad sa mga pending traffic violations sa unit, ug uban pa, dugang ni Lumapas.

Si Hyl Retuya, legal ug administration head sa TEAM, niingon nga ang mga sakyanan ma-claim hangtod nga ang Mandaue City Traffic Board modeklarar niini nga abandonado ug ablihan alang sa public auction.

Si Retuya miingon nga ang kita alang sa subasta, traffic violations, ug amnesty program ipadayon sa supply purchasing, mobile assets, traffic lights ug maintenance equipment ug uban pa.

Siya nidugang nga ang Team nakakolekta og mokabat sa P100,000 nga bayad hangtod sa Oktubre 2.

Ang City Ordinance 211-2023, nailhan nga Amnesty Program, giumol niadtong Hulyo ni Lumapas aron makatabang sa pag-decongest sa ‘puno kaayo’ nga Mandaue impounding area sa buhatan sa Team sa Barangay Centro. (HIC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph