Gisikop ang usa ka 32-anyos nga lalaki human siya nasakpan nga nagtanom og marijuana sa iyang nataran nga alang lang sa “pangkunsumo”.
Ang suspek mao si Danjuve Lutri Tan Codilla, 32 , ulitawo, taga Bugho, bukiran sa Lungsod sa San Fernando, Sugbo.
Siya gisikop sa kapulisan sa Martes sa hapon, Oktubre 3, ubos sa kamandoan ni Police Major Mark Anthony Villanueva.
Pangatarungan ni Codilla sa interbyo sa Superbalita Cebu nga nasayod siya nga ilegal ang pagtanom sa marijuana.
Apan wa siya magdahom nga isumbong siya ngadto sa kapulisan.
Gilarot ang duha ka mga dagkong punoan sa marijuana ug siyam ka seedlings niini.
Ang intelligence sa San Fernando Municipal Police Station nagkanayon sa dihang nahinabi sa Superbalita Cebu nga nakadawat sila og impormasyon gikan sa usa ka concerned citizen nga giingong dayag nga nananom og marijuana ang suspek.
Ang suspek gitanggong sa San Fernando Police Station samtang giandam ang kaso nga ipasaka batok kaniya. (DVG)
