Atake sa kasingkasing ang namatyan sa tiguwang nga lalaki nga unang gituohan nga giatake og unay sa iyang iro.
Base sa giluwatan nga death certificate alang kang George Mayol, 63, nga nakuha sa Talisay City Police Station, ang cause of death niini mao ang myocardial infarction kun atake sa kasingkasing.
Samtang sa report sa Scene of the Crime Operation (SOCO) ug sa PNP medico legal officer, way nakitang ilhanan nga gihilabtan si Mayol sa iyang mga iro.
Si Mayol napalgan nga patay niadtong Septiyembre 28, 2023 sa iyang balay sa Lawaan 1, Talisay City.
Si Police Staff Sgt. Noel Timagos, imbestigador sa Talisay City police, nitug-an sa mga tigbalita nga ‘natural’ death ang hinungdan sa pagkamatay ni Mayol.
Unang migawas nga taho nga si Mayol namatay human bugnoa sa iyang binuhing iro nga si Spike nga mixed breed.
Pamahayag sa mga silingan nga di kini ang unang higayon kay sa miaging tuig gibugno si Mayol sa iyang binuhing iro.
Gidudahan nga adunay foul play ang kamatayon ni Mayol.
Ang lawas gipa-cremate gilayon sa pamilya sanglit kunbinsido sila nga si Spike ang nagpatay.
Wa sila nisanong sa awhag sa kapulisan nga ipaubos sa autopsy ang lawas niini.
Sa samang kalambuan, gikatakda nga pabuhian na si Spike sunod semana gikan sa dog pound sa Talisay City.
Gipasabot ni Dr. Ma. Christine Hope Dejadena, Talisay City Veterinarian, nga wala mopakita og sintomas nga dunay rabies si Spike.
Sumala pa ni Dejadena, nga dili na maabtan pa og 14 ka adlaw nga gitagal nila ni Spike sa dog pound.
Basi sa ilang monitoring, wala silay nabantayan nga simtomas.
Gawas niini nagpabilin nga kalmado ang maong iro, di agresibo.
Samtang daghan ang nag-interest karon nga mo-adopt kang Spike apan kini ipaagi sa saktong proseso.
Si Spike dad-on sa usa ka shelter sa mga iro sa Oliveros, Can-asujan, dakbayan sa Carcar.
Matod ni Maureen Claro, kapin sa 10 ka tuig nang tig-rescue ug tig-atiman og mga iro, nga ilang kuhaon si Spike aron adto ibutang una sa ilang shelter.
Nag-andam na sila og kabutangan ni Spike sa ilang lugar.
Sama sa ubang netizens, si Claro sa chat sa Superbalita Cebu sa Martes, Oktubre 3, pinaagi sa Messenger, niingon nga base sa iyang kasinatian, way iro nga mopatay sa iyang amo nga nag-atiman kaniya kada adlaw. (GPL, REV)