GIBUTYAG sa Davao City Police Office (DCPO) nga naa na sila’y mga persons of interest (POIs) sa kamatayon sa usa ka kanhi kawani sa gobyerno niadtong Septyembre 28, 2023 didto Phase 1, Blk. 101 Lot 3, Deca Homes Talomo, Bago Gallera, Davao City.
Ang biktima nailhang si Lilian del Ocampo Nieva, 57-anyos, kanhi secretary ni kanhi Philippine Sports Commission (PSC) chairman William “Butch” Ramirez.
Ang tigpamaba sa DCPO nga si Police Capt. Hazel Tuazon niingon atol sa AFP-Press Conference kagahapon nga kini nga mga POIs wala pa gibutyag samtang nagpadayon pa ang imbestigasyon; apan dako ang posibilidad nga ang mga suspek paryente sa biktima sanglit walay forceable entry nga nahitabo atol sa inisyal nga imbestigasyon.
“Dili pa namo ma disclose ang identity ani nila pero ang importante naa na gyud tay persons of interest. Gipalawman na nato ang investigation,” ingon ni Capt. Tuazon.
aGidugang usab sa tigpamaba nga aduna nay special team nga mohimo og lawom nga imbestigasyon sa kaso nga gitawag og Task Force Oplan Siyasat imbis nga Special Task Investigation Task Group (SITG) nga natukod niadtong Oktubre 2.
Ang Oplan Siyasat pangunahan ni DCPO chief Col. Alberto Lupaz, kauban ang Criminal Investigation and Detection Group-Davao Region (CIDG-Davao Region) ug Regional Anti-Cyber Crime Unit.
Kahinumdoman nga nakaangkon og 44 ka mga samad dinunggaban ang biktima gamit ang kutsilyo.
Nasayran usab nga gidala sab sa responsable sa krimen ang iPhone 12 sa biktima, mga personal nga butang ug wala matinong kantidad sa mga alahas.
Si Nieva gilubong Oktubre 3 sa Davao Memorial Park. DEF