Libreng internet connection alang sa mga tinun-an, scholarships, gipaayo nga road networks, ug usa ka dialysis center mao ang pipila sa nagpadayong mga proyekto ug mga kalampusan nga gitaho ni Talisay City Mayor Gerald Anthony Gullas Jr. atol sa iyang ikalima nga State of the City Address (Soca) sa Miyerkules , Oktubre 11, 2023 sa City of Talisay Sports Complex.
Gamit ang teknolohiya, ang Soca ni Gullas gipresentar pinaagi sa usa ka audio-visual nga presentasyon nga nagsumada sa iyang nahimo sa siyudad sulod sa usa ka tuig nga pagdumala.
Sa iyang pangbukas nga pakigpulong, si Gullas niingon nga ang 27 minutos nga video presentation maghatag og sumada sa natuman nga mga tahas sa dakbayan kay sa pagpasabot sa matag programa nga gitanyag sa dakbayan ngadto sa mga konstituwente niini.
Matod ni Gullas nga ubos sa Aksyon Agad Administration, ang liderato kinahanglang sihag, dunay kaakuhan ug ang gobyerno usa ka serbisyo, dili gahom.
Matod niya nga ang Aksyon Agad dili angay isipon nga literal nga paghubad humandili sa tanang higayon makaadto sa usa ka dapit.
Matod niya nga ang Aksyon Agad usa ka “brand of service” nga nagdala sa mga serbisyo sa gobiyerno nga “mas paspas, mas duol, ug ma-access” sa katawhan.
“It’s about cutting the bureaucratic tape to make services be felt faster..” matod ni Gullas.
Sa bahin sa serbisyong medikal, gipasiugda ni Gullas ang kahumanan sa Social Services Building ug Talisay Dialysis Center, nga opisyal nga giablihan sa Huwebes, Oktubre 12, 2023.
Matod niya nga ang Social Services Building maoy one-stop location diin ang tanang mga programa sa Aksyon Agad ihatag sa matag lumulupyo sa Talisay City.
Sa katapusan, alang sa seguridad, iyang gipasiugda ang pag-instalar sa 28 ka mga brand new nga closed-circuit televisions (CCTV) ug ang pag-ayo sa 32 ka kasamtangang CCTVs, uban ang tumong sa pagpalig-on sa mga paningkamot alang sa padayon nga epektibong pagdumala sa trapiko sa lungsod.