NASIKOP atol sa buy-bust operation ang usa ka 20 anyos human nakuhaan og shabu niadtong Martes mga alas 6:00 sa hapon sa Barangay 31, Sto. Niño ning siyudad sa Cagayan de Oro.
Sa hiniusang puwersa sa Philippine Drug Enforcement Agency, Regional Office 10 nasikop si Jade Barcelona Nacional, ulitawo, residente sa Osmeña Extension, Barangay 22 ning siyudad.
Si Juliet Cagaanan kinsa Public Information Officer sa PDEA-Northern Mindanao nga nahinabi sa Sun.Star Superbalita niingon nga taod-taod na nga gisunod ang lihok niining si Nacional human nakumpirmang nagpaayuhot kini sa ginadiling druga tungod kay lakip kini sa listahan sa mga drug personality.
Nakuha atol sa buy-bust ang usa ka heat sealed transparent plastic sachet ug laing usa ka cellophane nga gituohang dunay sulod shabu ngadto sa usa ka PDEA Agent nga nagpatuong kostumer.
Nagtingkagol sa prisuhan ang suspetsado ning panahona kinsa gikatakdang pasakaan og kasong pagsupak sa RA 9165 ang Comphrehensive Dangerous Drugs Act of 2002.
Ang nakumpiskang mga ilegal nga drugas giduso na usab ngadto sa Regional Crime Laboratory alang sa eksaminasyon.
Matud ni Cagaanan nga giplano na usab sa mga sakop sa PDEA ang paghimo sa laing buy-bust operation sa pipila ka mga lugar ning siyudad diin iladong tigpayuhot og illegal nga mga druga.
Samtang ang kampanya ingon man mga symposium batok sa ginadiling druga padayon nga gihimo sa pipila ka mga personahe sa PDEA ngadto sa nagkadaiyang tunghaan ning siyudad. (SVB)