LIMA ka adlaw human gitulis ang First Community Cooperative (Ficco) Bank sa Puerto nasikop ang usa sa unom ka mga suspetsado.
Ang pagpanikop gipangulohan sa mga sakop sa City Intelligence and Detection Unit (Cidu) niadtong Miyerkules mga alas 5:00 sa hapon sa Aplaya, lungsod sa Jasaan, Misamis Oriental.
Ang suspetsado nga mao si Mike Zamayla, 36, niangkon nga siya ang driver sa motorsiklo nga naghulat sa iyang mga kauban atol sa pagpanulis sa Ficco.
Si PO1 Janice Alcontin sa Cidu nibutyag sa Sun.Star Superbalita nga natumbok ang suspetsado pinaagi sa tabang sa mga nakasaksi nga nakaila niini. Usa kini sa gipangita apan nasikop kini mismo sa puloy-anan uban sa tabang sa kapolisan sa Jasaan Police Station.
Nasayran usab gikan sa usa ka sibyaan sa radio nga nitug-an si Zamayla ug gipanganlan ang iyang mga kauban tungod sa kahiubos nga gamay lamang ang gihatag nga bahin kaniya atol sa pagpanulis.
Ang mga kauban nga ginganlan niini mao sila si Michael Manzano, Leo Cervano, Regor Mariano ug alyas Jhon kinsa padayon pang gipangita sa kapolisan ning panahona.
Ang lima ka mga suspetsado maoy gitumbok niini nga mga kauban sa pagpanulis sa Ficco diin nabitbit ang mokabat P84 mil.
Gituohang nga kini usab nga grupo ang responsible sa pagpanulis sa Small Hills Loans sa Kausawagan ning siyudad.