SI Presidente Noynoy Aquino nagmando nga idili na ang paggamit sa sakyanan og wang-wang kun sirena sa mga kalsada nga ang tumong lamang nga maka-overtake sa mga sakyanan nga nag-una.

Maayo nga reglamento. Kini nagpasabot nga nahuman na ang panahon niadtong gitawag ni Presidente Aquino nga "Naghahari-hariang de wang-wang sa kalsada". Human na ang panahon sa mga hawod.

Saksi kita nga mga molupyo sa dakbayan sa Davao nga kon dunay mga dagkong mamsa gikan sa Manila nga moabot dinhi makuyawan kita tungod kay mga pulis nga nag-escort kanila naggamit og wang-wang nga hilabihan kalanog, murag dunay emergency.

Kagahapon nagmando na si PNP Chief Jesus Verzosa sa iyang mga pulis nga tumanon ang mando sa bag-ong pangulo--wa nay wang-wang sa mga di otorisado nga mga opisyal.

Sa pagkatinuod, dunay balaod bahin sa wang-wang apan wa lamang gituman sa mga otoridad. Niadtong 1973, si Presidente Ferdinand E. Marcos nagpagawas og Presidential Decree 96 nga nagkanayon nga ang gitugotan lamang nga makagamit sa wang-wang mao ang Presidente, Bise Presidente, Presidente sa Senado, Speaker sa House of Representatives ug Supreme Court Chief Justice.

Hinuon, dunay ubang mga buhatan sa kagamhanan sama sa Fire Department, PNP, mga ambulansiya ug uban pa nga gitugtan  nga mogamit og wangwang alang sa emerhensiya.

Si Justice Secretary Leila de Lima nagklaro nga gawas kanila, wa nay gitugotan sa balaod nga mogamit og wang-wang sa kadalanan.

Sa ato pa nga kadtong mga patigayon nga magbukas, kadtong mga magparada kay magsaulog sa ilang sumad, di na tingali makagamit og wang-wang.

Kadtong nga opisyal nga magpapansin lang, human na ang ilang pagka-hambugero.