DAW nihunong ang tuyok sa orasan sa probinsya sa Davao del Sur samtang nag-apong ang katawhan sa telebisyon bahin sa pagpanumpa sa bag-ong napili nga pamuno nasud.

Sama sa duwa ni Manny Pacquiao, namingaw sud sa pipila ka minuto ang kadalanan sanglit daghan sa mga drayber ang nangita og lugar aron malantaw si President-elect Benigno 'Noynoy' Aquino III.

Matag pulong nga gibuhian ni Aquino apil sab nga nipalakpak ang pipila ilabi pa dihang gilakbitan niini nga di makalusot ang kurapsiyon ilawom sa iyang paggamhanan.

Usa ang tricycle driver nga si Levi Manzado sa siyudad sa Digos nga nagsulti nga nalipay kaayo sila nga gipasalig ni Aquino nga imbistigahan ang nikanaog nga si kanhi Presidenti Gloria Macapagal ug bana niyang si Mike Arroyo.

Naglaum usab karon ang mga drayber nga tutukan pag-ayo ni Aquino ang presyo sa lana sanglit nakahasol kaayo kanila ang pagbug-at sa galastuson.

Bisan ang pamilya ni Nestor Bedolido naglaum nga masulbad ang pagpamatay sa mga mediamen lakip ang kaso sa ilang kabanay.

Nanawagan sab karon ang pamilya sa gipatay nga mahatagan og sulbad ang matag political killing.

Sa Davao del Sur ikaduha na si Bedolido nga gipatay sa gituohang hugaw'ng pulitika. Unang gipatay kaniadto si Armando 'Racman' Pace apan hangtod karon gawasnon gihapon ang mastermind sa krimen.

Didto sa lungsod sa Bansalan, usa ka nagpailang si Gina ang nagpahayag nga giinitan gyud sila sa usa ka nagpasubling pulitiko human masayri nga wa niboto ang ilang pamilya ngadto kaniya.

Pipila sab ka mga barangay kapitan ang giingong nagdumot sa ilang mga lumolupyo kay wa nikuyog sa ilang kampanya aron iboto ang gisuportahang

kandidato.

Nanghinaot na lamang ang katawhan nga bag-ohon sa mga pulitiko ang ilang madinumtanon nga pamatasan ilabi pa kay nahuman na ang eleksyon ug atubangon na lamang ang angay nga serbisyong ilang gisaad panahon sa kampanya. (Dondon Dinoy)