USA ka lalaking gidudahang marijuana pusher ang napalgang patay human gipusil sa wa mailhing mga suspek didto sa Purok Lemonsito, Barangay Mankilam, dakbayan sa Tagum, Miyerkules sa hapon.
Nailhan ang biktima nga mao si Kenneth Lagura, 27, ug molupyo sa Dominggo Compound, Barangay San Miguel, sa siyudad.
Sa report gikan sa Tagum City Police Station nasayran nga mipatim-aw sa buhatan sa kapulisan si Kagawad Anecito Dumat sa Barangay Mankilan aron itaho ang napalgang patay'ng lawas nga nagbuy-od sa dapit sa Air Strip sa susamang dapit pasado alas 3:00 sa hapon.
Usa ka molupyo sa maong barangay nga si Fernando Aguilar ang nakadiskubri sa lawas sa biktima samtang nanguha siya og mga unas sa dahon sa saging.
Gilayong miresponde ang kapulisan aron susihon ang napalgang lawas sa maong dapit.
Sa paghiling sa mga otoridad sa lawas nasuta nga nahiagum kiniog mga samad pinusilan sa ulo ug likod nga bahin sa iyang lawas nga maoy gituohang hinungdan sa iyang kamatayon.
Nakuha sab sa mga otoridad gikan sa lawas sa biktima ang wa pa matinong gidaghanon sa gipauga nga dahon sa marijuana sud sa iyang bulsa.
Napalgan sab sa mga otoridad didto sa crime scene ang mga bala sa kalibre .45 nga pistola nga maoy gituohang gigamit sa mga suspek.
Nagtuo ang mga otoridad nga posibling may kalabutan ang pagpayuhot og gidiling druga sa biktima ang hinungdan sa iyang kamatayon.
Ang kapulisan sa siyudad sa Tagum mihimo karon og dugang imbistigasyon sa hitabo. (Marvin Pineda)