USA ka laborer ang gipusil patay sa wala mailhing tawo samtang naghapnig sa mga produkto sa uma didto sa Metro Circle, Magallanes, siyudad sa Davao niadtong Miyerkules.

Ang insidente nahitabo sa alas 8:30 sa gabii nga miresulta sa kamatayon ni Jullicar Hioca, alyas Hapon, 18, ulitawo ug nagpuyo sa Purok 7, Riverside Magallanes, Barangay 2-A Pocblacion, ning siyudad.

Si PO2 Danilo Alngog, duty investigator sa San Pedro Police Station, nagbutyag sa iyang spot report nga malinawon nga naghapnig sa mga utanon ang biktima didto sa Farmers Market Center apan nabalda dihang giduol siya mamumuno.

Matud ni Alngog nga walay daghang pangutana ang mamumuno gipusil sa makadaghan nga higayon ang biktima sa kalawasan mao nga natumba siya sa nahitaboan sa krimen.

Si Hioca gideklara nga patay na dihang miabot ang mga paramedics sa Central 911 ug mga sakop sa Scene of the Crime Operatives (Soco) nga gipangulohan ni Police Senior Inspector Felino Brunia.

Nakuha sa kapulisan ang upat ka mga baseyo sa .22 kalibre nga pistola ug atua karon sa kustodiya sa Soco 11.

Mga nakasaksi nagbutyag nga human sa pagpamusil yano kaayong milakaw ang mamumuno paingon sa Bankerohan Bridge.

Ang mamumuno gihulagway lang dunay gitas-on nga 5'4" ug  kasarangan ang panglawas sanglit nagtabon sa dagway siya gamit ang t-shirt dihang gihimo ang krimen.

Gisusi karon sa kapulisan ang mga anggulo nga posibleng hinungdan nga gipatay ang biktima kisa atua karon gihaya sa Angel Funeral Homes. (Alger Dura)