SA desisyung pag-umol og Truth Commission kansang tahas gisangon kang Retired Supreme Court Chief Justice Hilario Davide Jr., ang kampo ni kanhi Presidenti Gloria Macapagal Arroyo nakapanghinaway sa pamaagi sa bag-ong mi-asumir nga Pangulong Nasud Noynoy Aquino kay para nila kining maong pamaagi sa pagpangukod sa mga pasangil sa kahiwian sa gisundang administrasyon senyales sa kakuwang og konkretong plano alang sa kasamtangan ug sa umaabot.

Imbis nga himuong prayoridad ang pagpangita og kapasanginlan sa kahimtang karun sa nasud, mas maayo nga maoy unahon ni Presidente Noynoy ang tahas sa nation building aron maseguro nga iyang matuman ang gipasalig nga kausaban alang sa kabulahanan sa atong katawhan.

Click here for Election 2010 updates

Apan sa iyang pagpanumpa, si Noynoy sa iyang pamahayag mitin-aw nga sa iyang personal nga kapasidad iya nang napasaylo ang nakasala ngadto kaniya, apan dili iyaha ang katungod sa pagpasaylo sa mga personahe nga nakahimug dakong kasal-anan ug kadaut sa nasod. Kay niya pa, ang reconciliation nga walay paghatag og hustisya sa tanang hingtungdan mahisusama da sa pagtugot sa sala nga mamahimong mapadayunon ug nga kini maghatag pa og dugang kadaut og dili sa pagkakarun kini paga-kurihian.

Sa tanang mga pasalig ni Noynoy sa iyang pagpanumpa nga iyang pagabuhaton: (1) pagtukod og dugang classrooms sa tibook nasud ug pagpasaka sa standard sa edukasyon, lakip na ang kahigayunan sa vocational courses sa di makatiwas sa kolehiyo, (2) mas maayong transportasyun, (3) pagpalambo sa turismo (4) pagpalig-on sa negosyo, (5) infrastraktura, (5) law enforcement, peace and order, (5) pagpalambo sa sekta sa panrabaho, (6) balay sa tanang Pilipinong Pamilya ug uban pa ug nga wala'y bisan usa ang mabiyaan ning maong biyahe sa kalambuan.

Karun pa lang daan, samtang nindot nga kita molaum, di usab kalikayan nga kita makulbaan kay samtang tingali ang nagtukmod kang Noynoy nga mohimo ning maong pasalig mao ang tim-us nga tinguha nga iyang matagbaw ang kahigwaos sa katawhan. Apan sa kadako ug sa kadaghan niini, murag maglisod bisan pa gani si Superman sa paghatag og dinalian nga katumanan sa sud lamang sa 6 ka tuig nga pagpangatungdanan.

Ang nag-unang hinungdan nganong wa gyud maka-abante ang atong nasud mao ang atong daghang dagway sa hustisya nga ang agad-agaron mao ang si kinsa ang akusado. Kini mao ang kagaw nga naghatag og igong kaisog sa mga pulitiko og sa mga naghupot og puder sa gobyerno sa ilang paghimo og pagpangawkaw sa kaban sa gobyerno kay sila sayud man nga tungod sa ilang gahom, posisyun ug bahandi sila dili mamahimong taralon, patubagon ug silutan sa ilang nahimong kasal-anan.

Sa katapusan, ako nagatuo nga ang paghatag og katumanan ni Noynoy sa iyang pasalig sa paggukod sa tanang mga anomaliya ug pagpangawkaw usa ka kabilin nga mamahimong sinugdanan sa kalambuan ning atong nasud. Kay sa pagka-tinuod lang walay balay ang mobarug nga malungtarun kon ugaling ang mga gagmay ug dagkong anay ang dili pa mahurot sa pagkapuo.