KON matinuod ang gisaad ni Cebu City Mayor Mike Rama, mapaabot sa mga lomulupyo sa dakbayan sa Sugbo og dagkong kausaban sa unang usa ka gatos ka adlaw sa iyang pamunoan.

Naglakip kini sa pag-aspalto sa kadalanan, street lighting, pag-ayo sa drainage system, pagkolekta sa mga basura, paghapsay sa trapiko ug sa kahusay ug kalinaw.

Click here for Election 2010 updates

Ambot og iapil ba sa paghipos kadtong mga libod suroy nga makita natong nanagligdas sa mga aseras.

Kon matinuod kini, makahibawo na unya ang mga Sugbuanon nga di na si Tommy Osmeña maoy mayor.

***

Matod pa ni Mike Rama sa iyang pakigpulong human siya manumpa sa katungdanan, "Together with the City Council, I will not fail you in giving your mandate as your mayor. Tul-iron nato ang hiwi, ninduton nato ang bati, wagtangon nato ang baho, limpyohan nato ang hugaw, han-ayon nato ang gubot."

Ang nakaayo kay morag nakauyon si Cebu City south district Congressman Tommy Osmeña sa mga plano ni Mike Rama, labi na sa pag-aspalto sa kadalanan.

Matod ra ba sa kanhi mayor morag ginerbyos siyag dyutay sa "edifice complex" ni Mike Rama kon sa iyang mga proyekto sa pagpanindot sa mga edipisyo.

Ang nahibiling pangutana mao nga duna pa ba kahay nahibiling pundo sa panudlanan sa dakbayan human mahabwa-i sa political budget ni Tommy Osmeña sa miaging eleksyon.

***

Di sab makaseguro si Kong. Tommy Osmena kon mahimo ba ni Mike Rama ang iyang gilaraw nga buhaton sulod sa unang usa ka gatos ka adlaw tungod kay moagi pa man og bidding ang mga proyekto.

Yano ra ang tubag ni Mike Rama - ang street lamps nga naa pas bodega itaud, ang available nga aspalato gamiton. Kon kuwang, magpasar og supplemental budget.

Total, ang mga konsehal "otso-otso" man, pulos taga Bando Osmeña-Pundok Kauswagan. Wa gyuy mobabag nila sa kauswagan sa dakbayan.

***

Nibiya na si Tommy Osmeña human sa 15 ka tuig nga pag-alagad isip mayor sa dakbayan sa Sugbo alang sa iyang bag-ong katungdanan isip kongresista sa south district.

Niingon siya nga sa iyang paglantaw sa nangaging katuigan, iyang nausisa nga ang iyang pagka-arogante ug pagkadaling masuko nagsukad sa iyang paningkamot alang sa kaayohan sa dakbayan.

Karon nga kongresista na siya, matod niya, mora na siyag first year college didto sa Kongresso.

"I feel like a freshman in college. You go there, you line up, you sit down when they tell you to sit down and stand when they tell you to stand up," matod pas mayor.