Dear Papa Joe,
Tawga lang ko sa ngalan nga Aileen. Taga Leyte ko pero naa ko sa Talamban nag-stay. Minyo na ko ug naay tulo ka mga anak. Ang ako diayng edad kay 40 na.
Ang akong suliran mahitungod sa akong bana nga nausab na ug kon akong sukmatan sa tinarong na paagi sakit na man siya manubag nako.
Ako Papa Joe kanhi usa ka GRO ug wa sad malikayi nga naka-experience sad ko usahay nga i-out sa customer. Kining akong bana karon usa ni siya sa akong mga customer ug nahimong suki nako. Hangtod na nipadayag siya sa iyang gibati nako.
Tanang pasalig nga haw-ason ko niya sa lapok akong gituohan mao nga namalhin mi diri sa Cebu ug nagpuyo mi hangtod nga naka anak mi og tulo.
Mag one year na, Papa Joe, lahi na man siya. Permi na lang magmugtok ug halos di na makig-istorya namo. Ako siyang gipangutana unsay problema. Naa ba sa trabaho. Wala man sad daw. Hangtod nga mo bokal na akong dugo, mayawyawwan gyud nako siya ug maglalis mi. Moabot sa punto nga makasulti siya nako nga borikat daw ko atubangan sa akong mga anak. Gamahay daw siya nganong ako pa daw. Maorag nahugno ang akong kaugalingon ug lami na lang gud ipakamatay tungod sa kasakit niya manulti.
Sa akong nabantayan, Papa Joe, nga nagsugod ni siya dihang namatay iyang mama ug niuli ni siya didto apan iya ra ming gibilin. Sukad sukad mi namalhin diri, kadto pa siya niuli. Unsa kaha ang hinungdan no? Unsa kaha, Papa Joe? Tambagi ko.
AILEEN
Aileen,
Day, maayong adlaw kanimo. Sad to say no nga wala gyud ko masayod sad unsa iyang problema kay ikaw mismo nga kuyog mo wala man gani. Apan kini pangagpas lang ha. Mao ni ang mga basin… basin ikaw ang gibasol sa pamilya niya nga wala mag ulian ang imong bana didto nga namatay na lang iyang mama.
Basin naay dakong lalis nahitabo ug ikaw ang topic maong di kasulti imong bana nimo o basin ikaw ang gihimong sumsoman sa estorya didto samtang nagbilar unya nahimo siyang kataw anan tungod sa imong kagahapon ug ni resulta ba ron sa lalis o away.
Mao siguro na kon mag away mo mao na ang mogawas sa iyang baba ang mga mahait nga pulong bahin sa imong kagahapon. Pag ampo, Day, nga makaamgo imong bana sa iyang mga panaad nga haw ason ka sa lapok. Dili pa uwahi ang tanan. Naburyong lang na siya.
Unya next time since dehado ka sa imong kagahapon, ayaw na lang siya lalisa para dali ra siya makaamgo sa maayong side nga nahigugmaan niya nimo. Okay? Daghang salamat. Ubos ninyong alagad.
PAPA JOE