DESISYONAN na sa Regional Tripartite Wages and Productivity Board (RTWPB) ang petisyon sa gipangayong umento sa suholan sa Central Visayas sa di pa matapos ning buwana.
Kini ang gipasalig ni Department of Labor and Employment (Dole)-7 director Elias Cayanong, kinsa maoy chairman sa wage board, human sa gipahigayong public hearing kagahapon sa hapon.
Matod ni Cayanong nga "win-win decision" ang ilang ipagawas.
Tungod niini, malaumon kaayo ang labor sector nga duna gyuy ihatag nga umento sa suholan bisan pa man kon ang management sector kun mga representante sa nagkadaiyang kompanya nipadayag gyud sa ilang dakong pagsupak nga
usbawan ang minimum nga suholan.
Matod ni Dondon Montesclaros, kinsa nirepresentar sa Mepz Chamber of Exporters and Manufacturers (Mepzcem), nga mas dako pa sa minimum nga suholan ang nadawat sa ilang mga empleyado tungod sa nagkadaiyang mga benepisyo nga ilang gihatag.
Si Edgar Godinez sa Cebu Chamber of Commerce and Industry (CCCI) niingon nga gilatid nila sa ilang position paper nga inay nga umento sa sweldo. hatagan lang og non-wage benefit ang mga empleyado.
Gani, matod ni Godinez, giangkon man ni Neda-7 director Marlene Rodriguez sa iyang pagpresentar sa economic situation sa rehiyon nga wa pa gyud hingpit makabangon ang ekonomiya apan hinayhinay na kining naka-recover.
Matod ni Rodriguez nga naa pa lang sa 0.9 percent ang economic growth sa rehiyon itandi sa 3.4 percent sa tuig 2009 nga maoy tuig sa pag-igo sa krisis ug kini labihan kalayo sa 8 percent sa tuig 2008.
Apan matod sa nagpetisyong mga labor groups nga daghang mga rason nganong angayan nang patas-an ang suholan ug kini naglakip sa pagsaka na sa presyo sa nag-unang palaliton.
Atol sa hearing, giesplikar nila ni Boboy Belarmino ug Joe Tomongha sa Cebu Labor Coalition (Celac) nganong P128.60 ang ilang gipangayong umento.
Kini tungod ka yang maong kantidad maoy nawagtang sa kantidad sa peso sukad pa niadtong 1989 kay ang nominal wage unta karon naa na sa P335 apan P267 lang ang suhulan karon. (CPL)