TENSYON sa lungsod sa Compostela nagpadayon kay way nakab-ot nga maayong resulta bisan pa sa pag-abot sa sheriff gikan sa Commission on Elections (Comelec-Manila) nga niabot dinhi sa Sugbo kagahapon ug sa pagtudlo ni Gobernador Gwen Garcia kang DILG Director Pedro Noval isip kasamtangang mayor.

Si Garcia, ubos sa balaod isip gobernador, mahimong motudlo og kasamtangang mayor.

Click here for Election 2010 updates

Samtang possible nga karong adlawa mopagawas og kamandoan si Mayor-elect Joel Quiño nga hawanan na ang atubangan sa munisipyo sa tanang mga supporter, iya man o kang kanhi mayor Richie Wagas gamit ang kapulisan.

Samtang ang Department of Interior and Local Government (DILG-7) niila kang Quiño nga mayor sa lungsod.

Apan ang pangulo sa Cebu Provincial Police Office (CPPO) nga si Senior Supt. Erson Digal nitataw nga ang kapulisan nga gipadala sa lugar igo lang mopatuman sa kahusay ug kalinaw.

Iyang giklaro nga way sundon nga mando ni bisan kinsang tawo gawas lang kon makadawat silag klarong mga dukomento gikan sa DILG-7 nga nag-ila kang Quino nga mayor.

Kagahapon, niabot ang sheriff gikan sa Comelec-Manila nga si Peter Santa Rosa aron ihatag sa tanang hingtungdan ang kamandoan sa Second Division nga nagpahunong sa epekto niadtong proklamasyon sa mga nakadaog sa miaging eleksyon

gikan sa mayor ngadto na sa walo ka mga konsehal.

Si Noval nitataw nga ang gitudlong kasamtangang mayor sa nibiya na nga mayor sa lungsod nga si Wagas di mahimo.

Una niini, si Fejomar Quiño, Association of Barangay Councils (ABC) president, maoy giingong kasamtangang mayor tungod kay mao naman lang ang nahabiling opisyal sa lungsod.

Apan alang kang Noval di kini mahimo tungod kay di pinili si Fejomar sa mga tawo sanglit usa man lang kini ka ex-officio member.

Nihulga si Noval nga kon mamugos gyod si Quiño hayan mag-atubang kinig kasong administratiba nga usurpation of authority .

Samtang ang habig ni Mayor Quiño nipahigayon nag-session niadtong Miyerkules sa hapon ug nipatawag na usab og meeting sa tanang mga department head.

Subling nag-session ang konseho nianang hapon.

Padayon siyang niinsistir nga niasumir na sila sa katungdanan bisan pa og ila nang nadawat ang kopya sa kamandoan.

Si Noval nipadalag suwat ngadto na sa Comelec ug nagpakisayod kon unsay sunod nga mahitabo karon nga ila nang napatuman ang kamandoan ug padayong nilingkod ang mga napiling opisyal sa lungsod.

Matod ni Noval nga sa higayon nga matubag na ang iyang mga pangutana ug momando gyod ang Comelec nga gikinahanglang bakantihan ang puwesto, ang DILG-7 mohatag usab og report ngadto sa ilang ulohang buhatan.

Hinuon nasayran nga si Noval gitawagan na sa ilang ulohang buhatan nga paandamon tungod sa posebling siya ang itudlo nga officer-in-charge (OIC) sa maong lungsod.

Kini nisamot pa gyud human si Garcia nitudlo kaniya isip OIC.

Subay sa balaud, ang gobernador may gahom nga motudlo sa acting mayor panahon sa emerhensya aron malikayan nga mabakante ang posisyon sa lungsod, matod ni Capitol consultant manlalaban Rory jon Sepulveda.

Si Sepulveda niingon nnga wa namalibad ang gobernador nga siya maoy himoon nga acting mayor, apan naglikay siya nga mapasanginlan nga bias.

Kon kahinumduman, si Garcia maoy nahimong OIC sa lungsod sa Tudela, human mag-ilog ang duha ka mga mayor nga maoy mohupot sa lungsod.

Apan si Sepulveda niingon nga gisalig ni Garcia ngadto kang Noval ang pagdumala sa lungsod.

Sa pagkutlo niining balita, si Garcia tua pa sa kaulohan ug gipahibawo lang sa sitwasyon ug nipakanaug sa iyang hukom.

Gitataw usab ni Sepulveda nga ang gahom ni Noval isip OIC mao ang pagpamirma sa mga tseke alang sa budget sa sweldo ug uban pang operasyon sa basic services sa lungsod.Way gahom si Noval sa pagtudlo, pagtaktak o paghulip og mga posisyon sa mga kawani sa munisipyo.