WALANG wang-wang.
Gituman ni Presidente Noynoy Aquino ang usa sa iyang mga gisaad ngadto sa katawhan - ang dili paggamit og wang-wang o siren kon siya mopaingon na sa iyang trabaho sa MalacaƱang.
Ang mogamit og wang-wang, bisan kinsa ug unsa pa ang iyang ranggo, basta wa tugoti sigon sa nalatid sa balaod, mahimong dakpon. Kini maoy klarong mensahi sa Presidente.
Kagahapon, sa ikaduhang adlaw sa iyang administrasyon, si Aquino wa mogamit og wang-wang sa iyang pagpadulong sa Camp Aguinaldo aron ipahigayon ang formal nga turnover sa liderato sa Armed Forces of the Philippines.
Sama sa ordinaryong mga sakyanan, ang convoy ni Aquino nisunod sa hinay nga dagan sa trapiko. Nadelatar siya og maayo sa Edsa-Cubao diin naghuot ang mga sakyanan.
Resulta sa pagsunod sa iyang "walang wang-wang" nga saad, si Aquino nauwahi og 30 minutos sa iyang importante nga katuyo-an.
Kon duna pa untay wang-wang, di ta gyud ma-late ang Presidente.
Lisod kon maoy magpermanenti. Dili lang kay ni Aquino kon dili tingali og mosunod ang uban nga ang trapiko na lang ang ilang gamitong rason sa ilang pagka-late sa ilang trabaho.
Niini, mitumaw ang mga pangutana. Di kaha bakwion ni Aquino ang iyang "walang wang-wang" nga pamulong?
No. Kon iya kining buhaton, mahimong kataw-an siya sa mga tawo - way tarong baruganan. Kay kana iyang gipamulong iya gayud kanang barugan.
Iya kining ipadayon. Di man tuod siya mogamit sa iyang wang-wang o siren, apan niining higayona iyang mapahimuslan ang kapulisan nga sa matag karon ug unya mao nay perming magwanang sa kadalanan.
Ning paagiha, di lang ang presidente maoy makabenepisyo sa "walang wang-wang" kon dili apil na usab ang mga ordinaryong mga tawo.
Mao unya kini epekto sa "walang wang-wang" ni Presidente Aquino.