BODYGUARD ni Carmen Mayor Martin Gerald Villamor gipasanginlang nangulata sa usa ka kanhi traffic enforcer sa nahisgutang lugar niadtong Huwebes sa gabii.
Nipasangil pa ang mao nga kanhi kawani sa lungsod nga nagtan-aw lang ang mayor ug ang duha ka mga pulis sa pagpangulata sud sa police station.
Si Rodulfo Puno, kanhi traffic enforcer, nagpuyo sa Brgy. Cogon East sa nahisgutang lungsod, nidangop sa dySS Super Radyo kagahapong adlawa aron sa pagsumbong sa giingong gihimo sa bodyguard sa mayor.
Si Puno nibutyag nga niadtong Hunyo 30 gikan sa alas 8 hangtod sa alas 10 sa buntag, dunay gipahigayong checkpoints ang kapulisan sa lungsod.
Uban silang nanakop niadtong mga nagmotorsiklong nakalapas sa lagda sa trapiko ingon man way mga dukomentong napakita alang sa motorsiklo.
Giingong usa ka ginganlan lang og “Angkok Castro,” giingong bata-taba ni Villamor, niadto sa police station ug nipahibalw sa mga pulis nga ipa-release ang mga motorsiklo gumikan sa sugo sa mayor.
Pagka Huwebes sa alas 6 sa gabii, matod ni Puno, nga didto siya sa police station dihang niabot si Villamor uban ang bantay nga si Azor Guiroy, taga Brgy. Cogon West.
Siya nipasangil nga diha-diha gikulata ug gipatidpatiran siya sa makadaghang mga higayon ug wa gyud siya makasukol kay duna kiniy gidalang armas.
Matod niya igo rang nagtan-aw si Villamor sa pagkulata kaniya. Wa gyud kini mobadlong.
Lakip lang sa nagtan-aw mao sila si SPO1 Danny Laurente ug SPO1 Ricardo Enriquez.
Siya nidugang pagpasangil nga igo lang siyang gimanduan sa mga pulis sa pagdagan ug pag-ambak sa kural sa luyo sa police station.
Nagpa-medical check-up siya alang na sa iyang pagpasaka unyag pormal nga reklamo batok sa bata-bata sa mayor ingon man kanila ni Laurente ug Enriguez.
Matod niya nga di siya makatuo nga didto pa sa sulod sa police station siya gikulata.
Samtang si Sr. Insp. Milo Dagasdas, hepe sa Carmen Police Station nga nahinabi sa programang Imbestigador, niawhag kang Puno nga moduso gyud og reklamo batok sa tawo sa mayor ingon man sa mga pulis.
Ang Sun.Star Superbalita pakyas pagkuha unta sa habig ni Villamor labot na sa maong pasangil.
Apan si Sr. Supt. Erson Digal, director sa kapulisan sa lalawigan sa Sugbo, niawhag kang Puno nga mosang-at og reklamo batok na sa mga tawo sa mayor.
Giawhag usab ni Digal si Puno nga modusog reklamong kriminal, ingon man administratiba batok sa duha ka mga pulis sa Carmen nga gipasangilan niini nga way gihimong aksyon.
Si Digal nipasabot nga masusama lang nga hearsay ang mga pasangil ni Puno kon di kini mosang-at og kaso batok sa bata-bata sa mayor ingon man sa mga pulis sanglit di usab sila makaimbestigar sa kapulisan sa ilang mga sakop.
Giklaro ni Digal nga human niya masayri ang maong insedenti iya gilayong gipapangita si Puno apan wa kini mopatim-aw siguro gumikan sa kahadlok niini kay bata-bata sa mayor ang involve apan gikinahanglan nga dunay complaint ug tinud-on niini ang pagpasakag kaso.
Dugang ni Digal nga di sab makabuot ang mga bata-bata sa mayor kon mo-standby ingon man mosuroy ang bisan kinsang civilian sa police station kay kini public place.
Si Puno nibutyag nga gidid-an siya sa bata-bata sa mayor sa pag-standby sa police station human kini matangtang isip traffic enforcer sanglit co-terminus lang sila sa naparot nga si kanhi mayor Sonia Pua.
Giharos sa partido ni Villamor ang eleksyon.