USA ka manager sa banana plantation, gisikop sa kapulisan human gireklamo sa iyang silingan tungod sa pasangil nga nagpabuto og pusil didto sa Purok Everlasting, Barracks Compound, Barangay Visayan Village, dakbayan sa Tagum, Huwebes sa buntag.
Ang dinakpan nailhan nga mao si Alony Llaban, 60, tagdumala sa Soriano Banana Plantation ug molupyo sa susamang purok.
Sumala sa report gikan sa Tagum City Police Station, nga alas 8:00 sa buntag nagpabuto sa iyang kalibre .9mm nga pistola si Alony didto sa iyang balay hinungdan nga midangop sa kapulisan ang iyang mga silingan.
Dali dayon nga miresponde ang mga otoridad ug ilang gisikop ang suspek didto mismo sa iyang balay.
Ang suspek gidala dayon ngadto sa presinto sa kapulisan ug temporaryong gitangong sulod sa selda.
Nakuha sa kapulisan gikan sa suspek ang usa ka kalibre 9mm. nga pistola nga dunay serial number TT 166768 nga maoy gituohang gigamit sa pagpabuto.
Nadungagan pa ang kaso sa suspek dihang nasayran nga hupas na ang lisensya sa iyang armas niadto pang Hunyo 8, 2010.
Kapulisan mihimo na og dugang pakisusi sa hitabo, samtang kasong indiscriminate firing ug illegal possession of firearms ang giandam sa mga otoridad batok sa dinakpan. (Marvin Pineda)