USA ka lalaki nahiwa ang bukton human gitigbas sa iyang silingan didto sa Barangay Sasa, lungsod sa Nabunturan, Comval Province, Miyerkules sa gabii.
Nailhan ang biktima nga mao si Anastacio Capitutian, 46, samtang ang suspek mao si Marvin Gaid 21, ug pulos molupyo sa Purok 4, sa susamang barangay.
Sa report gikan sa Nabunturan Municipal Police Station nasayran nga pasado alas 7:30 sa buntag samtang didto sa nahisgutang dapit ang biktimang si Capitutian, kalit matud pa siyang gitigbas sa suspek nga si Gaid gamit ang sundang sa wa pa masayrang rason.
Ang biktima nahiagum og samad tingbasan sa iyang bukton ug daling gidala sa ospital.
Ang suspek mitahan sab dayon ngadto sa mga otoridad.
Kapulisan sa lungsod sa Nabunturan ang mihimo na og dugang imbistigasyon sa nahisgutang hitabo samtang ang kaso gihikay na batok sa suspetsado.(Marvin Pineda)