DUHA ka mga pulis nga nagsakay og motorsiklo padulong sa ilang kampo sa lungsod sa Sibonga, nabangga sa trak de karga sa N. Bacalso ave. (national highway) sa Barangay Sangat, lungsod sa San Fernando kagahapon pasado alas 4:00 sa kaadlawon, Lunes, Marso 2.
Patay dihadiha ang nagmaneho sa motorsiklo samtang ang angkas, kritikal sud sa tambalanan atol ning pagsuwat.
Si PSsgt. Paul Baclay, desk officer sa San Fernando Police Station nga nahinabi sa Superbalita Cebu, miila sa namatay nga si Patrolman Wenne Boy Cubong samtang kritikal ang angkas nga si Patrolman Frech Nickon Cabilla.
Ang duha pulos sakop sa Regional Mobile Force Battalion (RMFB) nga nagbase sa Sibonga, habagatang bahin sa Sugbo.
Sa imbestigasyon sa San Fernando Police Station kalabot sa insidente, nasayran nga ang duha ka mga biktima nga sakay sa motorsiklo nagbuy-od na sa dalan dihang naabtan sa nirespondeng kapulisan.
Ang San Fernando Rescue Team maoy nidala nila ni Cubong ug Cabilla sa Carcar City Provincial Hospital. Apan si Patrolman Cubong gideklarar nga dead-on-arrival (DOA) .
Samtang, si Cabilla nga kritikal gibalhin sa South General Hospital sa dakbayan sa Naga.
Matod pa, ang motorsiklo ni-overtake sa nag-una nga Ceres bus nga gimaneho ni Reynaldo Dela Victoria, hingkud, lumolupyo sa Barangay Labangon, siyudad sa Sugbo.
Apan gikasugat sa duha ang trak de karga nga gimaneho ni Glenn Conception, hingkod, lumad nga taga Barangay Casilao, lungsod sa Calatrava, Negros Oriental.
Ang trak de karga nagpadulong sa dakbayan sa Sugbo.
Giingong nalabay ang motorsiklo nga gisakyan ni Cubong ug Cabilla ngadto na pabalik sa dalan nga giagian sa duha busa naigo sa Ceres bus ug mikaliring paingon sa nagsunod nga sports utility vehicle (SUV) nga gimaneho ni Bengced Embraling, taga Barangay Liburon, dakbayan sa Carcar, nga nagsunod sa bus.
Tungod sa kakusog sa impact, wala mahitsura ang gisakyang motorsiklo sa duha ka mga pulis.
Si Dr. Kerwin Yap sa Carcar Provincial Hospital maoy mideklarar nga patay na si Cubong sa pag-abot niini sa tambalanan.
Ang hepe sa San Fernando Police Station, PCapt. Efren Diaz, gimandoan ang naghawid sa kaso nga ipailawom sa pagpa-autopsy si Cubong aron pagsuta kon wala ba kini kemikal nga posibling nakaimpluwensiya sa aksidente sama sa drugas o ilimnong makahubog.
Ang mga drayber sa trak de karga, Ceres bus ug SUV gipangtanggong sa San Fernando Police Station.
Posibleng mag-atubang ang tulo og kaso nga reckles driving resulted to homicide and serious physical injuries ang matag usa.