SI Maguindanao Governor Esmail Mangundadatu naghagit sa mga pulis sa probinsiya sa Maguindanao nga mo-resign kon walay mahimo kalabot sa masaker nga nahitabo sa lugar.

Sigun sa gobernador nga di siya magduha-duha nga palagputon sa pwesto si Maguindanao Police Provincial Director SSupt. Alex Lineses gumikan iyang nakita nga hangtud karon pabiling gawasnon ang ubang tawo nga nalambigit sa mangilngig nga krimen.

Gidugang sa gobernador nga kun way mahimo si Lineses sulod sa usa ka bulan nga paglutos sa mga private armed groups sa pamilyang Ampatuan,  mas maayo pang mamutos na lamang siya, mobiya sa katungdanan.

Sa talaan sa Criminal Investigation and Detection Group sa Autonomous Region in Muslim Mindanao (ARMM) nga 157 pa ka mga suspek sa milabay nga masaker ang padayong gipangita sa mga otoridad.

Gipamahayag sab ni SSupt. Lineses sa pakighinabi  kaniya nga sila naningkamot nga madakpan ang mga suspetsado, apan nalangan lamang kini gumikan dunay legal nga proseso sa balaod silang gisunod.

Grupo sa usa ka Kanor Ampatuan nga nangulo sa mga armadong alipures ni kanhi Datu Unsay Mayor Datu Andal Ampatuan Jr ang target karon sa gipalig-on nga operasyon sa kapulisan ug militar sa Maguindanao. (Edgardo Fuerzas)