SUWERTE pang naluwas gikan sa kamatayon ang usa ka 34 anyos nga lalaki human siya giluba dihang iyang gisumbag ang  gika-inom sud sa videokehan.

Nagkuyog pa ang suspek ug biktima nga nag-inom sa videokehan ni Alvin Emilio didto sa Barangay Dongan Pekong, lungsod sa Matanao, Davao del Sur.

Nahitabo ang insidente mga alas 4:40 ang takna sa hapon, Huwebes.

Ang giluba nailhang mao si Renante Manib, samtang ang gitudlong suspek mao si Melandro Mayo, 30,  ug pulos minyo nga nanimuyo sa maong lugar.

Si PO3 Erwin Echavez nga nihimo sa imbestigasyon, nagbutyag nga samtang nagtagay sa ilimnong makahubog ang duha dihang kalit nga gisumbag ni Manib ang higala.

Tungod sa gibuhat niya, ang suspek kinsa nagdala diay og mahait nga kutsilyo nihulbot niini dayon gihansak sa biktima.

Wa makabantay si Manib mao nga naigo siya sa walang bahin sa iyang dughan ug nisirit dayon ang daghang dugo.

Nagping-it sa kasakit sa samad dinunggaban ang biktima nga nahidangat sa Davao del Sur Provincial Hospital (DDSPH), kinsa daling gidapatan og tambal sa mga doktor.

Hinuon, gikatahong luwas na siya sa makuyaw'ng kahimtang.

Paghilabay sa pipila ka minutos, ang suspek gi-presentar ni Barangay Kagawad Rudolfo Lauda ngadto sa Matanao Police, samtang gihikay na ang kasong iyang atubangon. (Dondon Dinoy)