SI Vice Governor-elect Arsenio Latasa nagpadayag sa iyang tinud-anay nga suporta ngadto sa administrasyon ni Reelectionist Governor Douglas Ra Cagas.
Atol sa oath taking ceremony nga gihimo sa hapit na mahuman nga Davao del Sur Sports Complex and Convention Center gipamulong ni Latasa nga iyang ihatag ang syento porsyentong suporta sa gobernador.
"Akong ipaabot kaninyo ang akong 100 percent all out support ngadto sa atong gobernador ug wala'y ni bisan kinsang board member nganhi nga mamahimong mobabag," si Latasa nagkanayon nga gikakurat sa kadaghanan.
Unang gihungihong nga di mosipot si Latasa atol sa programa kagahapong adlawa sanglit sayod ang katawhan sa grabeng bangi ni Latasa ug Cagas bisan nag-angat pa lang piliay niadtong Mayo 10.
Si Latasa, nidagan ilawom sa partidong Nationalist Peoples Coalition (NPC) kuyog ni kanhi 2nd District Rep. Claude Bautista, kinsa niatbang ni Cagas.
Apan sumala ni Latasa nga angayan tuhuan ang iyang gipanulti atubangan sa bagang duot sa katawhan lakip mga mayors, barangay kapitanes ug uban pang mga sakop sa nagkadaiyang ahensya sa gobyerno sa Davao del Sur.
"Ayaw mo'g tuo sa mga intriga nga inyong nadunggan sa gawas kay ako na kining nagsulti kaninyo," ni Latasa human nipasalig nga mosuporta sa pagpalambo sa lalawigan.
Matod pa nga angayang undangon na ang pamulitika sanglit natapos na ang piliay ug aron nga makab-ot ang tinguhang pag-uswag sa probinsya.
Mahinumdoman nga apil sab si Latasa nga nipaluyo kaniadto sa kasong gipasaka ni Bautista batok ni Cagas kalabot sa katukuran sa sports complex.
Apan sa nahitabo gilantaw nga magkauliay na gyud sa ilang maayong kabubut-on si Cagas ug Latasa.
Hinuon, wa pay giluwatang pahayag ang ubang sakop sa partidong NPC human naghiusa ang gobernador ug bise-gobernador kinsa kanhi mortal nga magkaaway sa natad pulitika.
Samtang sa pagpamulong ni Cagas, gisaad niyang tiwason ang tanang proyekto nga iyang nasugdan.
"Ipadayon nato ang I-help program plus-plus-plus," matod niya.
Ang I-Help (Infrastructure, Health, Education, Livelihood, Peace and Order) program ug mga programa sa agrikultura, eco-tourism ug uban pa maoy nag-unang agenda ni Cagas human siya gipili pag-usab sa katawhan.
Gitunol sab niini ang iyang kinasing-kasing nga pasalamat ngadto sa katawhang nikuyog kaniya pinaagi sa ilang pagboto.
Wa pa sab masayri kung unsa'y dagan sa protesta nga giduso ni Bautista didto sa Commission on Election (Comelec) sa kauluhang Manila.
Apan dili pa lamang dugay mismong si Cagas nikanayon nga iya ng gitubag ang pasangil ni Bautista nga siya namalit og boto, naghuraw ug uban pang alegasyon panahon sa piliay. (Orlando B. Dinoy)