DUHA ka mga tawo ang midangat sa tambalanan human sila giluba sa alas 7:40 sa gabii niadtong Huwebes didto sa San Francisco, Uraya Terminal, Barangay Mintal, siyudad sa Davao.

Mga biktima mao sila Ryan Soson, 18, habal-habal drayber ug Jonathan Sarco, 24, minyo, pulos nagpuyo sa Barangay Mintal samtang ang mga suspetsado mao sila Johnny Mendez, hamtong ang pangidaron ug Alin Eslawan, pulos nagpuyo sa Kumintang Street, Barangay Mintal.

Si PO3 Roque Osico, imbestigador sa Tugbok Police Station, nagbutyag sa iyang spot report nga nagkalalis ang mga biktima ug mga suspetsado nga miresulta sa pagsinumbagay sa upat sa wala gikabutyag nga hinungdan.

Mga nakasaksi nagbutyag nga samtang nagkarambola ang upat, usa sa mga suspetsado ang mikuha og hait nga hinigiban dayon giluba ang mga biktima.

Si Soson naigo sa iyang likod samtang si Sarco naigo sa iyang nawong ug walang bukton hinungdan nga gidala sila didto sa Holy Spirit Hospital.

Human nagkadugo ang mga biktima, suma sa mga nakasaksi, daling mibiya ang mga suspetsado mao nga gipangita sila sa kapulisan.

Sa laing bahin, usa ka negusyante ang nabiktima sa wala mailhing Bukas Kotse Gang samtang nagparada sa iyang sakyanan sa 3rd Level, Gaisano Mall, Bajada, siyudad sa Davao niadtong Huwebes.

Alas 4:00 sa hapon giparada ang sakyanan nga Mitsubishi Lancer nga dunay plate number LCA-378 apan alas 8:00 sa gabii nadiskubrehan nga nahanaw ang car stereo, suma sa biktima nga si Milagros Abello, 43, minyo ug nagpuyo sa Talisay, Buhangin.

Si Abello nagkanayon sa kapulisan nga nahibulong siya nga abli na ang pultahan sa iyang sakyanan ug dihang iyang gihiling nawala ang car stereo nga nagkantidad og P15,000.00.

Mga sakop sa Sta. Ana Police Station naniid karon sa maong lugar sa pamasin nga dunay nakaila sa mga kawatan aron masikop ug mauli ang nahanaw nga butang. (AD)