DAVAO OCCIDENTAL -- Nagpadala na og dugang puwersa ang kasundalohan aron lutuson ang mga sakop sa rebeldeng New People's Army (NPA) nga naengkuwentro didto sa Jose Abad Santos sa probinsiya.
Atol sa engkuwentro, usa ka sundalo ang napatay samtang usa sab ang naangol.
Sumala pa nga 20 ka mga sakop sa NPA ang nasugatan sa mga sundalo hinungdan nga nahitabo ang bahug-bahog didto sa Barangay Culaman, alas 4:30 sa kaadlawon niadtong Martes.
Nakasangka sa mga rebelde ang mga sakop sa 73rd Infantry Battalion sa Philippine Army kon diin napatay si Private First Class Harold Sacramento ug naangol sab si Private First Class Jhonny Caballero.
Matud ni Senior Superintendent Michael John Dubria, director sa Davao del Sur Provincial Police Office mga rebelde nga nasangka sa militar ilawom sa Front Committee 71 sa NPA.
Gidugang ni Dubria nga nagpadala na sab og mga sakop sa Provincial Mobile Group ang kapulisan aron motabang paggukod sa mga rebelde.
Si Dubria kinsa adunay kontrol sa Davao Occidental, nagmando sa tanang hepe nga palig-unon ang seguridad sa lugar kay hayan manulong og mga istasyon ang mga NPA.
Kahinumdoman nga niadtong Marso, milampos ang mga NPA sa pagpabuto og landmines sa Barangay Managa, lungsod sa Bansalan, Davao del Sur ug pag atake sa Matanao Police Station. (Orlando B. Dinoy)