ANG Presidential Decree 96 gipagawas ni Presidente Ferdinand E. Marcos 1973, pipila ka buwan ang milabay human gideklarar ang martial law dinhi sa nasud.

Gilusad ang PD 96 kabahin sa tinguha ni Presidente Marcos nga pagtisok sa disiplina sa katawhan ubos sa iyang programa nga "New Society".

Ang tumong sa PD 96 mao ang pagdili sa mga dili otorisado nga mga tawo sa paggamit og sirena kun ang labing nailhan karon nga 'wang-wang'.

Ubos sa PD 96 kadtong gitugotan lamang nga mogamit og wang-wang mao ang Presidente, Bise Presidente, Presidente sa Senado, House of Representatives Speaker ug Supreme Court Chief Justice.

Sa sinugdan epektibo ug hapsay ang implementasyon sa dekrito. Gituman kini sa mga opisyal sa gobyerno ug sa mga duol sa dughan sa mga dagkong mamsa sa gobyerno.

Apan inanay nga nahanaw ang disiplina nga buot mahitabo ni Marcos ubos sa iyang New Society ug natabunan sa pagka-arogante sa pipila ang PD 96.

Nawala si Marcos sa poder human gilusad ang people power ug hingpit na nga nakalimtan ang dekrito.

Miagi ang daghang pangulo--Cory Aquino, Fidel Ramos ug Gloria Macapagal Arroyo ug wa namakahinumdom ang mga otoridad sa pagpatuman sa PD 96.

Bisa'g kinsa nga 'malakas' nagbaton og wang-wang sa ilang mga sakyanan.

Tungod kay dunay wang-wang sayon lang kanila ang pagpadagan sa ilang mga behikulo tungod kay mga sakyanan kon makadungog sa tingog sa sirena mopadaplin dayon sa kalsada.

Apan miabot ang panahon sa paghukom, napili nga Presidente si Noynoy Aquino ug gibanhaw niya ang ang pagpahamtang sa PD 96.

Sa laktud, nagkapuliki karon ang mga otoridad sa pagpanakmit sa mga wang-wang sa mga sakyanan.

Tan-awa ra kining mga otoridad. Taphaw ug salingkapaw ang panerbisyo.

Angay tingali nga patubagon sila tungod sa kapakyas sa pagpatuman sa balaod! Kon wa ma--presidente si Noynoy magpadayon unta ang "naghahari-hariang de-wang-wang sa kalsada".