USA ang patay ug laing duha ang nangaangol human nagrambol ang grupo sa mga lalaki sa usa ka videokihan niadtong Huwebes mga alas 7:45 sa gabii sa Barangay Bulahan lungsod sa Claveria, Misamis Oriental.

Dead on the spot si Michael Dihito, lumad nga taga probinsya sa Lanao del Sur, human nahabwa ang tina-e ug naigo ang kasingkasing dihang giluba.

Samaran ang duha ka mga higala nga mao sila si Charlito Albea, 25, minyo, sa susamang dapit ug Conrado Quilizaldo, 16, ulitawo, lumad usab nga taga Lanao del Sur.

Gitumbok nga mga suspetsado mao sila si Juma Jariol, Edu Sabanto, Niño Delito ug laing wala mailang kauban, mga residente lamang sa kasikbit nga dapit.

Nasayran nga nag-inom ang tulo sulod sa usa ka balay kalingawan sa maong dapit diin anaa usab sa pikas nga lamesa ang grupo nila Jariol.

Dihang pulos na mga hubog ang duha ka grupo nagbikil na og storya nga miresulta sa rambol.

Nagsukmagay ug wala masayran nga adunay dalang kutsilyo ug icepick ang mga suspetsado. Gitabangan og luba si Dihito.

Wala pa nakuntento ang mga suspetsado giapil pagluba sila si Albea nga naigo ang likod ug hawak sa mga biktima gamit ang ice pick.

Girespondehan sa kapolisan sa Claveria Police Station ang inisdente apan daling nakasibat ang mga suspetsado ug wala masikop.

Si Albea ug Quilizaldo, gidala ning panahona sa Northern Mindanao Medical Center (NMMC) kinsa pulos luwas na sa makuyawng kahimtang apan padayon pang giatiman sa mga doktor.