GIPANGITA pa sa kapolisan ang suspetsado sa pagluba patay sa usa ka lalaki niadtong Martes sa hapon sa Sitio Pinikitan, Barangay Camaman-an, ning siyudad sa Cagayan de Oro.
Gibutyag ni Police Inspector Dominador Orate, deputy station commander sa Police Station 2 (PS2) sa Cogon, nga ilang gipangita ning panahona ang suspek sa pagluba ni Jay-Are Lucagbo, 18, residente sa susamang dapit.
Gitumbok nga suspetsado naila lamang sa ngalan nga alyas Bunso.
Sa inisyal nga imbestigasyon nag-inom ang biktima niadtong tungora sa usa ka videoke bar sa Cogon ning siyudad dihang kalit nga gibikil sa suspek.
Sa sukmagay ug rambol nga hitabo nisangpot sa pagpangluba nga miresulta sa pagkaigo sa biktima sa lainlaing parte sa iyang lawas gamit ang icepick nga miresulta sa iyang hinanaling kamatayon.
Dugang ni Orate nga posibleng grupo sa mga rugby boys ang suspek sa pagpangluba nga sagad magtambay sa maong dapit.
Sa pagsulat ning balita padayon pa nga giimbestigahan ang kaso ug padayon usab nga gipangita ang suspek. (SVB)