NAKITANG wala nay panimuot ang usa ka Korean national nga gituohang giposposan og bug-at nga butang kagahapon mga alas 5:00 sa kadlawon sa Agora ning siyudad sa Cagayan de Oro.

Girespondehan sa kapolisan sa Police Station 3 (PS3) sa Agora ang biktima nga naila lamang sa ngalan nga mao si Joven Lee, wala mahibaw-an ang puloy-anan niini.

Gisaysay sa mga mirespondeng kapolisan sa Sun.Star SuperBalita nga nakitang nagbuy-od ug nakadugo ang ulo niini ingon man hubog ang biktima ug wala na kini panimuot.

Dihang gidala sa kapolisan sa Northern Mindanao Medical Center (NMMC) nakumpirmang giposposan si Lee tungod sa usa ka pulgada nga samad niini sa ulo.

Sa inisyal nga imbestigasyon nasayran nga gikan naglingaw-lingaw sa usa ka balay kalingawan si Lee ug giingong adunay gika-table nga usa ka wala mailang babaye.

Nisaysay ang Koreano sulod sa balay tambalanan dihang naulian na sa panimuot nga ang maong babaye maoy nibunal kaniya ug nikuha sa mga personal nga gamit ug wala matinong kantidad dayon mibiya kaniya.

Sa pagsulat ning balita padayon pa ang gihimong imbestigasyon sa kapolisan kalabot sa insedenti ingon man pagsuta pila sa kantidad ang nawalang gamit niini.

Nagpabilin pa sa balay tambalanan ang Koreano nga padayon pang giatiman sa mga doktor kinsa giingong langyaw `lamang ning siyudad apan nanimuyo na didto sa siyudad sa Davao.