IMBES misibat aron dili makulatahan sa mga tawo nga iyang gikalalis sulod sa videokehan, wala damha sa usa ka tawo nga kamatayon ang iyang dangatan samtang nagpalayo siya sa maong lugar human nabangga ang iyang gimanehong motorsiklo sa ala 1:30 sa kaadlawon niadtong Biyernes.
SI PO2 Degamo sa Buhangin Police Station nag-ila sa namatay nga mao si Rino Magbanua, 24, lumad nga taga Bambad, Sultan Kudarat ug nagpuyo sa San Lorenzo, Buhangin, siyudad sa Davao.
Matud ni Degamo nga namatay ang biktima tungod kay maayong pagkabangga sa motorsiklo nga iyang gimaneho sa salamin sa Hazels Jaca Cakeshoppe didto sa Carpio Subdivision, Buhangin.
Sa unang pagresponde sa kapulisan ug paramedics sa Central 911, wala nay gininhawa ang biktima nga nagkadugo pipila ka metros ang gilay-on sa iyang motorsiklo nga walay plate number.
Tungod sa kakusog sa dagan sa biktima, maayong pagkabuak sa salamin sa cakeshoppe. Wala hinuon gikabutyag sa report kung pila ang danyos sa maong gambalay.
Sa gihimong makuting imbestigasyon sa kapulisan, nasayran nga nakakita og lalis ang biktima sulod sa videokehan sa Kilometro 6, Buhangin.
Mga nakasaksi sa panaglalis nagbutyag nga daling misibat ang biktima sakay sa iyang motorsiklo paingon sa Cabantian Road diin siya gisugat sa dimalas nga miresulta sa iyang kamatayon.
Ang biktima tua karon gihaya sa Angel Funeral Homes samtang ang motorsiklo atua sa Buhangin Police Station. (AD)