ANG pamunuan sa Davao del Sur Provincial Police Office (DDSPPO) nagmando sa tanang hepe sa tanang istasyon sa pulis sa probinsiya nga molihok batok mga sakyanan nga naggamit og sirena kun mga wang-wang.
Sa gipagulang direktiba ni Senior Superintendent Ronald dela Rosa, provincial police commander, gikanayon niya nga tinud-on sa mga hepe ang pagpaniid sa mga tawong mogamit og sirena sa ilang mga sakyanan.
Niguwa ang mando human nga gipasiatab ni Presidente Benigno "Noynoy" Simeon Aquino III atol sa iyang inaugural speech, nga di na tugtang mogamit og wangwang ang si bisan kinsa.
Gitumbok ni Aquino ang mga politikong mahilig magpa-tratar nga Very Important Person (VIP) sa ilang pag-agi sa kadalanan pinaagi sa paggamit og sirena aron makalusot sa huot nga trapiko.
Lakip sa gipasidan-an sa kapulisan ang mga ambulansiya nga mogamit og sirena bisan og walay kargang pasyente nga angay tabangon.
Ni dela Rosa, hugot nilang ipatuman ang kamanduan batok sa mga hambugerong nagagamit og sirena diha sa kadalanan.
Nasuta nga lakip mga pribadong sakyanan ilabi pa kun adunay koneksyon sa gobyerno magwang-wang sa kalsada.
Gipasidan-an sab sa kapulisan ang ilang mga kauban sa trapiko nga di mogamit niini bisan pa man og si kinsa ang bisitang politiko ma-lokal man o nasyunal. (Orlando B. Dinoy)