USA ka opisyal sa pulis nanghimakak sa taho nga nangayo og P25 milyon ka pesos ang mga tawong midagit sa anak ni Comelec Commissioner Elias Yusof.

Gibutyag ni Lanao del Sur Police Provincial Director SSupt. Paniares Adap nga walay kamatuoran ang mikatag nga balita nga dunay gipangayo nga ransom money ang mga armadong grupo nga maoy mikidnap kang Noraldin Yusof.

Matud ni Adap nga gipangayo sa mga suspetsado ngadto sa Commission on Election (Comelec) nga pakawad-an og bili ang resulta sa eleksiyon sa lima ka munisipyo sa Lanao del Sur.

Sa kasamtangan, nagpadayon ang negosasyon sa Crisis Management Committee (CMC) nga gipangulohan ni Governor Mamintal Adiong ngadto sa mga kidnapers aron mabuhian ang biktima.

Gikompirma sab ni Mindanao Development Authority Chairman Jess Dureza nga may positibong resulta ang ilang back channelling talks ngadto sa mga armado.

Apan anam-anam ang ilang paglihok aron dili mabutang sa alanganin ang kinabuhi ni Noraldin.

Gipamahayag ni PNP-Autonomous Region in Muslim Mindanao Regional Director Bienvinido Latag nga ang mga suspek mga Private Army sa usa ka naparot nga kandidato sa milabay nga piniliay, natumbok na sab nila ang naasoy nga grupo. (Edgardo Fuerzas)