GITUOHANG gi-atake sa sakit ang usa ka dalaga kinsa napalgan na lamang nga nagbuy-od ug wala na’y kinabuhi kagahapon mga alas kwatro sa kaadlawon sulod sa usa ka subdivision sa Iponan, dakbayan sa Cagayan de Oro.
Naila ang babaye nga si Eliza Malacora, 41, accounting staff, residente sa nahisgutang dapit kinsa usab giingong dunay heart failure ug high blood.
Sa nahipos nga report, gikabutyag nga napalgan na ang dalaga nga nagbuy-od duol sa panimalay niini kinsa nag-inusara lamang kini nga nanimuyo.
Gibutyag usab sa atbang niini nga panimalay nga mga alas 9:30 sa gabii, nakadungog pa kini og tingog nga nagpakitabang apan sa dihang gilantaw niini ang gawas nga bahin sa panimalay wala kini nakita.
Napalgan na lang ang patay nga lawas kinsa gitoohang nahagba sa dihang giatake sa gihambing nga sakit.
Nasutang abli pa ang pultahan sa panimalay niini lakip na ang telebisiyon hinungdan nga nagtoo ang mga silingan nga galain na ang pamati niini ug misulay pa sa pagpakitabang.
Sa inisyal nga imbestigasiyon sa Scene of the Crime Operatives (Soco) sa Northern Mindanao, walay nakitang foul play o mga samad agi’g dinunggaban sa patay nga lawas sa biktima apan gisusi pa kini aron masuta ang hinungdan sa kamatayon niini.
Sa pagsulat niini nga balita, ang insidente ang padayon pa nga giimbestigahan sa Soco-Northern Mindanao aron makumpirmang wala’y foul play sa insidente.