USA ka dalaga patay nang napalgan samtang naligo sa kaugalingong dugo niadtong Biyernes didto sa siyudad sa Kidapawan.

Ang biktima giila sa kapulisan nga mao si Rose Mae Mana-ay, 17, molupyo sa Barangay Pangaw-an, Magpet, North Cotabato.

Gibutyag ni SPO2 Condrado Abalos nga banda alas 12:20 sa udto, nakit-an sa mga residente sa Apo Sandawa Homes Subdivision ang patay nga lawas sa biktima kilid sa sapa nga naka-angkon og samad dinunggaban sa nagkadaiyang parte sa iyang lawas.

Dako ang pagtuo ni Abalos nga posibling gipatay si Mana-ay sa laing dapit ug gilabay lamang sa maong sapa o kaha naanod.

Sa paghiling sa mga imbestigador sa lawas sa biktima, duna kiniy mga bun-og ug nagkadugo ang kinatawo nga gituohang gilugos pa kini sa mga wala mailhing suspek.

Matud ni Armando, uyuan sa biktima, nga sa wala pa gipatay ang batan-on nadunggan kini niya nga makigkita sa iyang ka-textmate.

Hangtud karon blangko pa ang otoridad sa motibo sa kamatayon sa biktima, diin padayon pa silang naniid aron maillhan ug madakpan ang mga suspetsado. (Edgardo Fuerzas)