WA NAY anting-anting si Gloria Macapagal-Arroyo. Human napupos ang iyang termino isip presidente sa Pilipinas, nahanaw na kang Arroyo ang immunity nga maoy nanalipod kaniya gikan sa mga kaso. Isip usa ka kongresista limitado na ang iyang immunity.

Dinhi karon makita ang katag kun dutlan na ba siya og kaso human mipasaka og asunto ang usa ka militanteng pundok didto sa Department of Justice nga karon gipangulohan ni Secretary Leila de Lima.

Ang kaso kabahin sa NBN-ZTE deal nga gituohang adunay nalambigit nga anomaliya. Misangko na ang asunto kaniadto sa Ombudsman ubos ni Merciditas Gutierrez apan gitaktak.

Daghan ang nagtuo nga si Gutierrez suod sa mga Arroyo mao nga wa nisalir ang kaso.

Kini ang hinungdan nga ang pundok militante nila ni Rep. Teddy Casino nakahukom ning higayona nga didto sa DOJ ipasusi ang kaso.

Sa iyang panahon, way nakatarog ni Arroyo. Kublan siya di lang sa mga kaso tungod sa iyang immunity nga gitugot sa balaud apan wa usab siya dutli sa kasong impeachment nga gipasaka batok kaniya, tulo ka higayon, didto sa kamara baha.

Wa nagmalampuson ang mga asuntong impeachment gumikan kay kadaghanan sa mga kongresista mga batus o somos ni Arroyo.

Apan lahi na ang sitwasyon karon ubos sa Aquino Adiministration. Primero, wa na siya'y immunity ug ikaduha, maihap na lamang ang mga kongresista nga mounong kaniya ug sa iyang kawsa.

Gawas sa NBN-ZTE deal, gikataho nga daghan pang kaso ang ipasaka batok ni Arroyo ug sa iyang bana nga si Mike.

Hinuon, maayo kini nga panghitabo alang ni Arroyo. Dinhi niya karon pamatud-an nga wa siya'y sala ug di tinuod ang mga alegasyon kaniya ug sa iyang bana. Kun wa siya'y sala makabatun na siya og kalinaw sa panghunahuna. Apan kun duna siya'y nahimong sala, angay kini niya bayaran aron magsilbing panaminan sa tanan.