NAKASULOD gyud sa round-of-64 knockout stage ang tanang 16 ka Pinoyng mga bilyarista nga apil sa 2010 World Pool Championships (World 9-Ball) sa Doha, Qatar.
Kini human nakalingkawas sila si Efren “Bata” Reyes, Lee Vann “The Slayer” Corteza, Antonio Gabica, ug Jeffrey De Luna gikan sa makuyaw nga loser’s bracket sa ilang tagsatagsa ka grupo sa miaging gabii.
Si Reyes, kinsa bag-uhay lang napili nga Player of the Decade, mibutlog kang Ihab Hassan sa Egypt, 9-0, sa katapusan niyang duwa sa elimination round.
Ang lumad nga taga Davao City nga si Corteza mipukan kang Mohanna Obaidly sa Qatar, 9-3, gibuntog sa Sugbuanong si Gabica si Corey Deuel sa United States, 9-3, samtang gilupig ni de Luna si Khalid Almutari sa Kuwait, 9-3.
Ang ubang mga Pinoy nga nakasulod sab sa round-of-64 mao sila si Dennis Orcullo, Ronato Alcano, Antonio Lining, Venancio Tanio, Allan Cuartero, Francisco Felisilda, Raymund Faraon, Oliver Medenilla, Israel Rota, Venancio Tanio , Marlon Manalo ug Joven Alba.