WALA pa man tuoy kontratang napirmahan apan gikatahong nagkauyon na sila si pound-for-pound champion Manny Pacquiao (51-3-2, 48 Kos) ug Floyd Mayweather Jr. (41-0, 25KOs) nga mag-away karong Nobiyembre 13.
Tulo ka mga venue ang gipilian alang sa away – ang Thomas & Mack Center, MGM Grand sa Las Vegas ug ang Dallas Cowboys Stadium.
Usa sa nakitang mga rason nga hapsay ang dagan sa negusasyon ning higayuna mao ang pagpakahilom sa duha ka mga kampo, usa ka leksyon nga ilang nakat-unan sa pagkahagba sa nahiunang negusasyon.
Ning higayuna, gikauyonan nga mopaubos sa usa ka gag order ang tanang mga nangahilambigit sa negusasyon hangtod nga dili pa ma-finalize ang kasabutan.
Alang sa adviser ni Pacquiao nga si Michael Koncz, ang gag order nakahatag gyud og kahigayunan sa mga nangahilambigit nga tutokan gyud og maayo ang negusasyon.
“The last time around, there were a lot of comments made in the media from both sides. Whether they were true or false, I don’t think was important. But this thing was negotiated in the media the last time, and that’s what made it difficult to get the deal done,” matod ni Koncz sa interbyu sa www.fanhouse.com.
Ning bag-uhay lang, si Top Rank boss Bob Arum nga ang tanang mga dokumento naa na karon sa kamot ni Mayweather.
Matod pa ni Arum nga nauyonan nga kinahanglang sa dili pa molapas ang Hulyo 15, hayan makadesisyon na gyud si Mayweather kon makig-away ba siya o dili kang Pacquiao, di gyud iyang hikayon ang negusasyon sa laing kontra alang kang Pacquiao.
Hinuon malaumon kaayo si Arum nga molampos na gyud ang negusasyon ning higayuna.