HULYO 1, sugdan na sa mga palarang mananaog ang pagtimon sa renda sa pamunuan. Bug-at ang yugo sa katungdanan nga ilang gipas-an. Sila maoy gisangonan isip tinugyanan sa atong ugma. Dili unta sila mobalising padulong sa ilang personal nga interes. Kay ang kahigayonan ra ba giingong maoy makapahimong kawatan sa tawo. Nasayod kitang tanan nga ang graft and corruption nagpabilin nga nag-unang batakang problema sa atong nasod.
Makatugkad
Kadtong nakatugkad sa giladmon sa kawad-on sa katawhan sa atong komunidad maisip nga maayong public servant. Tungod kay ilang masabtan ang pinitik sa pulso sa mga kabos. Dili panagbingkil sa managlahing balhibo sa politika ang gikinahanglan sa katawhan. Ang nagpaabot nga mga tawo giuhaw sa mga serbisyo ug proyekto sa Agrikultura ug Pangisda, Panglawas, Edukasyon, Kalikopan ug Kinaiyanhong Bahandi ug ang Kooperatiba ug Kapanginabuhian.
Hunungon
Human god sa piniliay, wala kita magkinahanglan sa padayong pinahitay sa mga opisyal nga nagpasilong sa managlahing landong sa politika. Walay mapugnit nga kaayohan sa pagsigig pangaway kay kini makalamay lamang sa dili maayong ugma. Apan atong nasabtan nga ang mga midaog sa milabayng eleksyon ingon og nanukad na sila sa umaabot piniliay sa barangay karong Oktubre ning tuiga. Nagnanaw sila kinsay ilang ibutang nga pundasyon sa barangay pangandam sa ilang politikanhong laraw sa 2013.
Eleksyon
Kon walay magbabalaod nga mopanday og resolusyon nga mag-uswag sa barangay election, mahinayon gyod karong Oktubre kay mao man kini ang nalatid sa batakang balaod. Busa, magsugod na usab ang katawhan pagpunting kon kinsay himuong tinugyanan sa ugma sa atong barangay. Magpaihap kita sa katilingban nga atong gipuy-an, mao nga atong salmotan ang balaanong kalihokan. Mano-mano ang eleksyon sa barangay ug dili computerized kay gamay ra man ang pili-onon sumala pa sa Comelec.
PAHALIPAY
Tugoti nga kining lindog motunol og pahalipay sa tanang mga midaog isip independent nga kandidato. Ilabina sa bag-ong haon nga konsehal sa Argao, Ruben Villamora. Dili man god sayon ang pagdaog nga walay grupo.
Si Villamora akong best friend ug classmate sa kolehiyo. Tinuod gyod diay nga ang kakabos dili balabag sa kalamposan. Pulos man god mi nakasinati sa kapait sa among pagtungha, nakawhat ang pag-antos apan gihulipan sa matam-is nga kalamposan. Kini bisan paman sa hinukad nga sakripisyo ug daghang makalusno nga mga pagsulay.
(yahoo ID & e-mail add: sa_1156@yahoo.com / cell #: 0905-250-4643)