MIHURAR na si Presidente Noynoy Aquino ug nagsugod sa iyang paglingkod isip presidente sa tibuok nasud. Ngiga no, kinsa may nagdahom sa miaging tuig nga usa na sab ka Aquino ang atong mahimong presidente. Ug siya anak mismo nilang Ninoy ug Corazon Aquino.
Kahinumdoman, dihang buhi pa si kanhi presidente Cory, lahi gyud ang mga nawong sa mga kandidato nga nanagan ug kalit lang kining nisulbong si Noynoy nga daw mao dayoy gisuportahan sa mayorya sa mga Pilipino tungod sa iyang kredibilidad isip limpyo nga politiko ug sa saad nga siya magdala og kausaban sa atong nasud.
Kon atong panaminan, atong masabot nga nitumaw si Noynoy isip alternatibo kang Presidente Gloria Macapagal-Arroyo nga maoy labing dakong isyo sa kampanya tungod sa korapsyon.
Di ko gusto mo-speculate dayon kon matuman ba gyud ni Noynoy ang iyang mga saad sa miaging kampanya labi na sa pagwagtang sa korapsyon.
Atong mapaabot nga duna kiniy daghang mga inisyatiba nga sugdan sulod sa ubang 100 ka adlaw sa iyang termino nga giingong duna sab siyay honeymoon period sa media.
Kon molampos ba siya, ato unya kanang makita sa ngadto-ngadto.
MAGLIKAY
Naabot sa Sugbo sa miaging semana gikan sa University of the Philippines si Mayor-elect Democrito Diamante sa Tuburan dihang ako siyang nasugatan kagahapon kay nag-crash course kabahin sa pagdumala og usa ka Local Government Unit (LGU).
Matod pa niya, isip neophyte mayor nagkinahanglan siyang mangandam aron makasilbe pagtarong labi na nga daghan siya og mga plano alang sa iyang lungsod.
Apan nabalaka sab siya nga mapiit sa padayong bangi karon nilang Gob. Gwen Garcia ug Bise Gob. Greg Sanchez.
“Ang lungsod man gud ang masakripisyo. Wa man koy labot nianang ilang panagbangi,” matod pa sa incoming mayor.
Gani, niingon si Diamante nga di siya interesado nga mahimong presidente sa mayors’ league kay di na hinuon niya maateman ang Tuburan. Iyang giusab sa pag-esplikar nga bag-o pa siya isip usa ka local government executive ug nagkinahanglan sa iyang atensyon ang iyang bag-ong katungdanan nga amahan sa lungsod.
Hinuon, isip usa ka sakop sa Liberal Party, nasiguro ko nga di lisod ni Mayor Diamante sa pagkuha sa igong suporta gikan sa Malakanyang ug sa Kongreso alang sa iyang mga proyekto unya.
LIG-ON
Sa akong basa kaniya, nagpraktikal lang kini si Mayor Diamante nga di gustong mababagan sa iyang mga proyekto diha sa Kapitolyo.
Sa laing bahin, mabasa sab nako karon sa kampo ni Gob. Gwen Garcia kuyog sa iyang igsuong si Pablo John ug amahan nga si Pabling diha sa Kongreso nga nakakita nag-agianan nga maduol sa luwag sa bag-ong administrasyon.
Sa pagkakaron, igo lang mangangha kini si Kong. Tomas Osmeña nga wa gyud masuweto sa pasikot-sikot sa Kongreso ug nasudnong politika. Igo lang siyang moingon nga maayo pagkamaniubra sa mga Garcia.
Alang kanako hinuon, dali rang makat-on kini si Osmeña sama sa ubang mga Osmeña nga naabot sa Kongreso sugod sa iyang lolo nga si Don Sergio ngadto sa iyang amahan nga si Serging. Ug usbon ko ang usa nako ka punto nga gipadayag sa kulom sa Sun.Star Cebu.
Kinahanglang mapakita ni Tomas nga makamao sab siya sa duwa sa Manila ug sa Kongreso ug usa sa importanteng kab-uton niya mao ang pagkahimong chairman sa usa ka gamhanang komitiba.